पोखरा ।
पोखरा महानगरपालिका वडा नं २९ मा रहेको दीपशिखा सामुदायिक पुस्तकालयले ‘निरन्तर शिक्षाका लागि पुस्तकालय’ भन्ने आदर्श वाक्यका साथ १७ औं पुस्तकालय दिवस मनाएको छ ।

सो अवसरमा ‘पठन संस्कृतिको विकासमा पुस्तकालयको भूमिका’ विषयमा वक्तृत्वकला प्रतियोगिता भएको छ । लेखनाथ क्षेत्रका १९ संस्थागत तथा सामुदायिक विद्यालयका कक्षा ८, ९र १० का २९ विद्यार्थी सहभागी रहेको प्रतियोगितामा डायमन्ड माविकी अंकिता आचार्यले प्रथम स्थान हाँसिल गरिन् ।

प्रतियोगितामा जनप्रकाश माविकी अनुषा काफ्ले दोस्रो बन्दा डायमन्डकै स्वस्तिका देवकोटा तेस्रो भइन् । गोगन माविकी सुजाता पौडेल र रिलायन्स पब्लिककी दीपशिखा क्षेत्री क्रमशः चौथो र पाँचौं ठहरिए ।

कार्यक्रममा पोखरा महानगरपालिका शिक्षा महाशाखाका वरिष्ठ शिक्षा अधिकृत बद्रिनाथ सुवेदीले पठन संस्कृतिको विकास गर्नका लागि पुस्तकालय दिवसले प्रोत्साहित गरिरहेको वताए ।

दीपशिखा सामुदायिक पुस्तकालयका कोषाध्यक्ष माधव भण्डारी र त्रिवेणी इन्टरनेसनल कलेजका सहायक क्याम्पस प्रमुख डिल्लीराम पौडेल निर्णायक थिए ।

पुस्तकालयका अध्यक्ष कृष्णहरि भण्डारीको अध्यक्षतामा भएको प्रतियोगितामा कार्यक्रम संयोजक विष्णुहरि पौडेल, वडा नं २९ की वडा सदस्य निर्मला पौडेल लगायतले बोलेका थिए ।