पोखरा ।
पोखराको फेवा किनारमा दोस्रो सडक आर्किटेक्ट शोधकार्य प्रदर्शनी भएको छ । पोखरा इन्जिनियरिङ कलेजको आयोजनामा भएको प्रदर्शनीमा पोखराका प्लस टु साइन्स र प्लस टु ओभरसियर अध्यापन गराइने करिब डेड दर्जन विद्यालयका विद्यार्थी सहभागी बने ।

विभिन्न प्रकारका रोचक र समय सान्दर्भिक वास्तुकला संरचनाका नमुना अर्थात आर्किटेक्ट डिजाइन प्रदर्शन गरिएको थियो । प्रदर्शनी गण्डकी प्रदेशका आर्थिक मामिला मन्त्री डा टकराज गुरुङले उद्घाटन गरे । मन्त्री गुरुङले नेपालको प्रमुख आर्थिक गतिविधिमा पर्यटन पर्ने भएकाले अबका इन्जिनियरहरुले आर्टिटेक्ट डिजाइन गर्दा नेपालको मौलिक पहिचान झल्कने वास्तुकलालाई जोड दिनुपर्नेमा जोड दिए ।

उनले पोखरामै उत्कृष्ट प्राध्यापकहरुबाट आर्किटेक्ट पढाइ हुने भएकाले गण्डकी प्रदेशका विद्यार्थी आर्किटेक्ट अध्ययनका लागि बाहिर जानुनपर्ने बताए । शोधकार्यमा नयाँ नयाँ डिजाइन देखिएको बताउँदै उनले ती डिजाइनहरु वास्तविकतामा परिणत हुनुपर्नेमा जोड दिए ।

कलेजका विभागीय प्रमुख तथा आर्किटेक्ट समीक्षा कँडेलले शोधकार्य प्रदर्शनी औपचारिकतामात्र नभई विद्यार्थीको प्रतिभा उजागर गर्ने अवसरसमेत रहेको औंल्याइन् । दुई हजार ५ सयभन्दा बढीले प्रदर्शनी अवलोकन गरेको कलेजका प्रशासन प्रमुख चिजकाजी गुरुङले जानकारी दिए ।

विद्यालयका निर्देशक अम्बर गुरुङको अध्यक्षतामा भएको कार्यक्रममा प्रिन्सिपल इन्जिनियर सोम गुरुङ, विद्यार्थीद्वय लीना तिलिजा र देविका थापाले बोलेका थिए ।