पोखरा । पोखरामा नेपालमै पहिलोपटक ३ वर्षे डिप्लोमा तहको कार्यक्रम ‘ब्युटी एन्ड कस्मेटोलोजी’ विषयको पढाइ हुने भएको छ ।

गण्डकी टेक्निकल इन्स्टिच्युट (जिटिआई) ले प्राविधिक शिक्षा तथा व्यावसायिक तालिम परिषदको स्वीकृतिमा उक्त पढाइ सञ्चालन गर्न लागेको हो ।

जिटिआई पोखराको आयोजना तथा गुरुङ ब्युटी पार्लर एन्ड एकेडेमी प्रालि तथा सिटिइभिटीको सहकार्यमा पोखरामा शनिबार आयोजित कार्यक्रममा उक्त जानकारी गराइएको हो । कार्यक्रममा सिटिइभिटीका निर्देशक टैलेन्द्र आचार्यले पहिलोपटक सुरु गरिएको यो कार्यक्रमका लागि काठमांडौमा गणेशमान बहुप्राविधिक शिक्षालय र पोखरामा गण्डकी टेक्निकल इन्स्टिच्युटलाई अनुमति दिइएको बताए । उनले ८ वर्ष पहिला नै ब्युटी एन्ड कस्मेटोलोजीको पाठ्यक्रम निर्माण गरिएको जानकारी दिँदै आवश्यक परेमा पाठ्यक्रम परिमार्जन गरिने बताए ।

गुरुङ ब्युटी पार्लर एन्ड एकेडेमी प्रालिका संस्थापक सञ्चालक चिनु गुरुङले ब्युटीपार्लर व्यवसायमा मेसिन तथा केमिकलको प्रयोगबाट सौन्दर्यकर्मी र ग्राहकहरुमा हुनसक्ने स्वास्थ्यसम्बन्धी जोखिम कम गर्न यस्तो वियषले सहयोग गर्ने बताइन् । उनले ३ वर्षको ‘ब्युटी एन्ड कस्मेटोलोजी’ डिप्लोमा कोर्सले सौन्दर्य व्यवसायीहरुमा समयानुसार परिमार्जन भएर आएका प्रविधिको प्रयोग गर्न सहज बनाउने विश्वास व्यक्त गरिन् ।

ब्युटी एन्ड कस्मेटोलोजीका बारेमा सौन्दर्यकर्मी पवित्रा घिमिरेले प्रस्तुतीकरण राखेकी थिइन् । उनले यो विषयको महत्वका साथै पढ्नुका फाइदाबारे बारेमा जानकारी गराइन् ।

कार्यक्रममा पोखरा महानगर व्यवसाय प्रवर्दन केन्द्रका कार्यकारी निर्देशक नवराज अधिकारीले गण्डकी प्रदेशमा १४ सयभन्दा बढी व्यक्तिहरु प्रत्यक्षरुपमा सौन्दर्य व्यवसायमा आबद्ध रहेको बताए । तर निकै कम संख्यमा यसको विशेषज्ञ रहेको अवस्थामा यो विषयको पढाइले थप सहयोग मिल्ने विश्वास उनले व्यक्त गरे ।

कार्यक्रममा जिटिआई पोखराका अध्यक्ष ध्रुव शर्माले सौन्दर्य पेसालाई मर्यादित र व्यावसायिक बनाउन प्राविधिक शिक्षाका रुपमा यो कार्यक्रम अघि बढाइएको बताए । उनका अनुसार ६ सेमेस्टरमा पढाई हुने यस कार्यक्रमका लागि ४ लाख ९५ हजार शुल्क तोकिएको छ ।