सुरेश अधिकारी
पोखरा

गत मंसिरमा १३ औं दक्षिण एसियाली खेलकुद अन्तर्गत बिच भलिबल प्रतियोगिताका लागि वाराही घाटमा खेल मैदान बन्यो । ५ रोपनी क्षेत्रफलमा बाराही घाटनजिकै ४ खेल मैदान तयार पारिएको थियो । बिच भलिबलका लागि भौतिक संरचना निर्माण गर्न ५२ लाख रुपैयाँ साग आयोजक समितिबाट छुट्ट्याइएको थियो ।

यो योजना अनुसार कोट निर्माण भएको कास्की जिल्ला भलिबल संघका अध्यक्ष भीम पराजुली बताउँछन् । ५ हजार ५ सय घनमिटर माटो, बालुवा लगायत प्रयोग गरी फेवाताल किनारमा बिच भलिबल कोट तयार भएको थियो । फेवातालको माथिल्लो भागको माटो र तनहुँ, पोखरा विभिन्न ठाउँबाट संकलन गरिएको बालुवा कोटमा प्रयोग भएको छ । पोखरालाई खेल पर्यटनको सहरका रुपमा विकास गर्ने चर्चा बेला बेलामा भइरहन्छ । खेल पर्यटनका लागि बिच भलिबलको भूमिका महत्वपूर्ण हुने र ती कोट संरक्षण गर्नुपर्ने पराजुली बताउँछन् ।

श्रीलंका, बंगलादेश, भारत, अस्ट्रेलिया, अमेरिका, जापान, चीन लगायतका देशमा बिच भलिबल खेलिन्छ । पानी पर्दा कोटकोे पूर्व भागबाट माटो बगेर कोटमा जाने हुनाले बेलैमा यसको संरक्षणका लागि सम्बन्धित निकायको ध्यान जानुपर्ने पराजुलीले औंल्याए । राष्ट्रिय खेलकुद परिषद्का सदस्य सचिव राजेश गुरुङले बिच भलिबल कोट निर्माणका लािग ६० लाख रुपैयाँभन्दा बढी खर्च भएको सुनाए । उनले संरक्षणको विषयमा नेपाल ट्रस्ट, खेलसँग सम्बन्धित संस्था र पर्यटन व्यवसायीले छलफल गरी उपाय निकाल्नुपर्ने विचार राखे । निर्माणसँगै संरक्षणको खाँचो रहेको र यस खेलबाट पर्यटन व्यवसायीलाई फाइदा हुने उनको भनाइ छ ।

पश्मिाञ्चल खेलकुद विकास समितिका कार्यालय प्रमुख लक्ष्मण योगीले बिच भलिब कोट केही दिनअघि राष्ट्रिय खेलकुद विकास समितिका सदस्य सचिव रमेश सिलवालले निरीक्षण गरेको बताए । उनले सिलवालसँग खेलकुदको संस्थाले नै संरक्षण गरेर भोगचलन गर्ने कुरा भएको जानकारी दिए । योगीका अनुसार अहिलेसम्म कसले यसको संरक्षण गर्ने भन्ने यकीन भइसकेको छैन ।

ट्रेकिङ एजेन्सी एसोसियसन अफ नेपाल (टान) पोखरा अध्यक्ष हरि भुजेलले बिच भलिबल कोट संरक्षणको खाँचो औंल्याए । उनले संरक्षणको जिम्मा दिए पर्यटन व्यवसायी र लेकसाइडका क्लब तथा स्थानीय संघ, संस्थाले जिम्मा लिने बताए ।