राजन उपाध्याय
दुलेगौंडा

शुक्लागण्डकी नगरपालिकामा रहेका अव्यवस्थित बसोबासीका माग सम्बोधनमा ढिलाइ भएको भन्दै यस क्षेत्रका जनप्रतिनिधिले मन्त्रालयलको ध्यानाकर्षण गराएका छन् । पुर्जा दिलाउन दिएको १ वर्षको म्यादमा सकिन लाग्दासमेत काम खासै हुन नसकेपछि जनप्रतिनिधि, पार्टी प्रतिनिधि र शुक्लागण्डकी नागरिक समाजको टोलीले शुक्रबार राजधानी गएर ध्यानाकर्षण गराएको हो ।

कतिपय ठाउँमा नीतिगत रुपमा स्पष्ट हुनुपर्ने देखिएपछि फागुन १२ गते बसेको समितिको पाचौं बैठकले समस्या फुकाउन मन्त्रालयमा पत्रचार गर्ने निर्णय भए अनुसार पत्राचार भएको थियो । तनहुँका प्रमुख जिल्ला अधिकारी रुद्रप्रसाद पण्डितको अध्यक्षतामा बसेको बैठकले कानुनी तथा नीतिगत स्पष्टता, समितिको म्याद थप गर्ने लगायतका विषयमा मन्त्रालयमा पत्राचार गरेको थियो । राजपत्रमा उल्लेख भए अनुसार घर बनाएर बसेकालाई बढीमा डेढ रोपनीको मात्र पुर्जा दिलाउने उल्लेख छ ।

‘हामीले आयोगमा भएका निर्णयबारे भूमि सुधार मन्त्रालयका सहसचिव चन्द्रकला पौडेललाई १ प्रति हस्तान्तरण ग¥यौं,’ वडा नं. ७ का अध्यक्ष रामबहादुर क्षेत्री थापाले भने, ‘१ हप्ताभित्र समस्या समाधानका लागि ड्राफ्ट तयार गर्ने सहसचिव पौडेलले प्रतिवद्धता जनाएका छन् ।’ नगरका ४ वडाबाट पुर्जाका लागि १ हजार ९ सय ३ जनाले निवेदन दिएका छन् । सोही अवसरमा साथै उनले वडाको भवन निर्माणका लागि खैरेनीटारमा रहेको ग्रामीण विकास प्रतिष्ठानको नामको केही जग्गा उपलब्ध गराइदिन माग गरेको जानकारी दिए । प्रतिष्ठानको नाममा करिब १ सय ३० रोपनी जग्गा छ ।

वडा नंं. ८ का अध्यक्ष कृष्णप्रसाद रेग्मीले नगरपालिकामा रहेको एकमात्र राष्ट्रिय अस्पताल जिपी कोइराला राष्ट्रिय श्वासप्रश्वास उपचार केन्द्रलाई प्रभावकारी बनाउने विषयमा समेत स्वास्थ्य मन्त्रालयको ध्यानाकर्षण गराएको बताए । यस अस्पताललाई व्यवस्थित र स्तरोन्नतिका लागि स्वास्थ्य तथा जनसंख्या मन्त्री भानुभक्त ढकाल सकरात्मक रहेको रेग्मीले सुनाए । यस क्षेत्रका संघीय सांसद केदार सिग्देलको नेतृत्वमा गएको टोलीमा मेयर किसान गुरुङ, प्रवक्ता खिमबहादुर कुमाल, वडाध्यक्ष, शुक्लागण्डकी नागरिक समाजका अध्यक्ष खेमराज खनाल लगायत सहभागी थिए ।