काठमाडौं

नेकपा नेता तथा पूर्वगृहमन्त्री भीम रावलको सुरक्षामा खटिएका सशस्त्र प्रहरीका १ जवानमा कोरोना संक्रमण भएको छ । मंगलबार राष्ट्रिय जनस्वास्थ्य प्रयोगशालामा गरिएको परीक्षणमा उनमा कोरोना संक्रमण पुष्टि भएको रावलका स्वकीय सचिव गोविन्द दुलालले बताए ।

ती सुरक्षाकर्मी १ महिना पहिलादेखि बिदामा गएका थिए । पत्नी बिरामी भएपछि बिदामा गएका उनी १ महिनापछि फेरि काममा फर्किन लागेका थिए । सशस्त्र प्रहरीको सुरक्षा गणबाट फेरि रावलको सुरक्षामा खटिन लागेका उनलाई कोरोना परीक्षण गरेपछि मात्रै आउन भनिएको थियो । सशस्त्र प्रहरीको अस्पतालमा उनको कोरोना परीक्षण गर्दा पाेजेटिभ देखिएकाे थियो ।

रावलको सुरक्षार्थ खटिने गाडीमा रहने उनी भक्तपुर दुवाकोटका हुन् । सशस्त्र प्रहरीले नेपाल प्रहरी र स्वास्थ्य मन्त्रालयको टिमसँग समन्यवय गरेर संक्रमित ती व्यक्तिको कन्ट्याक्ट ट्रेसिङ गरिरहेको जनाएकाे छ ।