समाधान संवाददाता, पोखरा

वीरगञ्जको १ बैंकमा कार्यरत कर्मचारीलाई आफूभन्दा सिनियरको फेसबुक आइडिबाट म्यासेज गयो ।

म्यासेजमा आफूभन्दा सिनियरले ‘अप्ठ्यारोमा परेको छु’ भनेर इसेवामार्फत रकम पठाइदिन आग्रह गरे ।

आग्रह स्वीकार्दै मेसेजमा उल्लेख गरेको इसेवा एकाउन्टमा ती कर्मचारीले १ लाख रुपैयाँ जम्मा गराइदिए ।

रकम पठाएपछि मात्र उनलाई थाहा भयो कि आफू ठगिएको । रकम पठाइदिन आग्रह गर्ने उनका सिनियर कर्मचारी नभई अन्य कोहीले फेसबुकमा फेक आइडी बनाएर ठगी गरेको थियो ।

वीरगञ्जका बैंकरलाई ठग्ने पोखरा ३ नदीपुरका २१ वर्षीय रोशन हमाल ठकुरी थिए ।

ठकुरीविरुद्ध जाहेरी परेपछि जिल्ला प्रहरी कार्यालय कास्कीले उनलाई नदीपुरबाटै साउन २६ गते पक्राउ गरेको छ ।

‘फेसबुकमा फेक आइडी बनाएर विश्वासमा पारेर उसले ठगी गरेको खुलेको छ,’ प्रहरी प्रवक्ता सुवास हमालले भने, ‘पक्राउ गरी ठगी आपराधिक विश्वासघात तथा आपराधिक लाभ (एक्टर्सन) सम्बन्धी कसुरमा ७ दिन म्याद थपेका छौं ।’

ठकुरीले नजिकका आफन्त र साथीभाइलाई पनि उस्तै किसिमले ठगेको अनुमान प्रहरीको छ । उनीबाट ठगिएको भए सम्पर्क गर्न कास्की प्रहरीको अनुरोध छ ।

ठकुरी विद्यार्थी हुन् । यसअघि पनि उनले विभिन्न मुद्दामा कारवाही भोगिसकेका छन् ।

विद्युतीय कारोबार ऐन, २०६३ विपरीतको कसुरमा ९ महिना थुनामा बसेका थिए ।

सार्वजनिक अपराध मुद्दामा भने कास्की प्रशासनमा ५ हजार धरौटी तिरी छुटेको अभिलेख प्रहरीसँग छ ।