पोखरा ।
बगर भाइ खलकको आयोजनामा जारी दोस्रो दिनको खेलमा आयोजक बगर भाइ खलक हरियो टिम विजयी भएको छ । बगर भाइ खलक एट ए साइड अन्तर्राष्ट्रिय भेट्रान्स फुटबल प्रतियोगिता अन्तर्गत भएको खेलमा आयोजक वगर भाइ खलकको ‘ए’ टिमले काठमाडौको वौद्ध भेट्रान्समाथि ५–२ ले सहज जित दर्ता गरेको हो ।

टुडिँखेल मैदानमा भएको खेलमा बगर भाइ खलकका मनोज गुरुङले ह्याट्रिक पूरा गरे । खेलमा बगर भाइ खलकका लागि राजकुमार लामा र दीपक गर्वुजाले समान १–१ गोलको योगदान दिए । पराजित वौद्धको तर्फबाट रञ्जित लामा र तीर्थ लामाले १–१ गोल गरे । ‘स्वास्थ्यको लागि १ घण्टा व्ययाम, नागरिकहरुका लागि नौलो आयाम’ भन्ने मूल नाराका साथ भएको उक्त प्रतियोगिता अन्तर्गत दोस्रो दिन ७ खेल भएका छन् ।

लिगकम नक आउटका आधारमा सञ्चालन भएको प्रतियोगिता अन्तर्गत सानो गौचरन भेट्रान्स काठमाडौले थापा गाउँ काठमाडौलाई ३–० ले पराजित गरेको छ । पूर्व राष्ट्रिय खेलाडीहरु सागर थापा, छन्नुराम चौधरी, नरोत्तम गौतम र राकेश श्रेष्ठ सम्मिलित टिम सानो गौचरनले लयमा खेल प्रदर्शन गर्दै थापा गाउँमाथि सहज जित हासिल गरेको हो । खेलमा म्यान अफ दि म्याच राष्ट्रिय टिमका पूर्व कप्तानसमेत रहेका सागर थापाले १ गोलसँगै अजव श्रेष्ठ र नितिन गुरुङले समान १ गोल गरेका थिए ।

अर्को एक खेलमा हेटौंडाको नागसोती टिमले सिमरा भेट्रानलाई २–० ले पराजित गरेको छ । खेलमा म्यान अफ दि म्याच निमा लामा र सुलभजंग राणाले समान १ गोल गरेका थिए । अर्को एक खेलमा आयोजक बगर भाइ खलकको ‘बि’ टिम वुटबल भेट्रान्ससँग पराजित भएको छ । बुटवलका भरत काउछाले ह्याट्रिय पूरा गरी म्यान अफ दि म्याचको ट्रफी हात पार्दा चण्डिका चौधरीले टिमका लागि १ गोल गरे । प्रतियोगिता अन्तर्गत नै पशुपति भेट्रान्स काठमाडौंले आफ्नै जिल्लाको किङ कम भेट्रान्सलाई टाइब्रेकरमा २–१ ले पराजित गरेको छ ।

अर्काे खेलमा पोखराको एबिसी भेट्रान्स ‘ए’ टिमले काठमाडौको टुँिडखेल भेट्रान्समाथि ३–० को सहज जित दर्ता गरेको छ । खेलमा म्यान अफ दि म्याच हरि खडका, डम्बर गुरुङ र नरेन्द्र गुरुङले समान १ गोल गरेका थिए । अर्को खेलमा पोखराको लेकसाइड भेट्रान्स पाहुना टोली काठमाडौको फ्रिडम फाइटरसँग टाइब्रेकरमा २–१ ले पराजित हुँदै स्तब्ध बनेको छ । खेलमा फ्रिडमका किपर सहिन श्रेष्ठ म्यान अफ दि म्याच बने ।

४० देखि ६५ वर्षको उमेर समूहका पाका खेलाडीको खेलबाट नयाँ पिढीलाई खेलकूदप्रति अभिरुचि जगाई खेलाडी उत्पादन गर्ने लक्ष्य राखिएको उक्त प्रतियोगितामा २५ टिमको सहभागिता रहेको संस्थाका अध्यक्ष दिलबहादुर गुरुङले जनाएका छन् । उपाधि विजेताले १ लाख ५१ हजार १ सय १ सय ११ सहित रनिङ सिल्ड, पदक र प्रमाणपत्र, उपाविजेताले नगद ७५ हजार ५ सय ५५ सहित ट्रफी, पदक र प्रमाणपत्र प्राप्त गर्ने छन् ।

उत्कृष्ट गोल किपर, उत्कृष्ट डिफेन्डर, उत्कृष्ट मिडफिल्डर र उत्कृष्ट फरवार्डलाई ट्रफीसहित जनही नगद ५ हजार दिइनेछ भने सेमिफाइलन पुग्ने २ टिमले नगद १० हजार पाउने छन् । सर्वोत्कृष्ट खेलाडीलाई ट्रफीसहित नगद १० हजार प्रदान गरिनेछ । प्रतियोगिता गर्न २० लाख खर्च लाग्ने अनुमान गरिएको छ भने २१ लाख ५० हजार आम्दानी हुने अनुमान गरिएको संस्थाका अध्यक्ष रमेश श्रेष्ठले जनाए ।