पोखरा ।
पोखरामा भएको रगत अभावलाई कम गर्न गुल्मेली समाज पोखरा र रेसुंगा बचत तथा ऋण सहकारी संस्थाले बुधबार खुला रक्तदान आयोजना गरेका छन् ।

कार्यक्रममा ४२ युनिट रगत संकलन भएको समाजका वरिष्ठ उपाध्यक्ष नारायण न्यौपानेले जानकारी दिए । समाजका सल्लाहकार प्राडा यदुनन्दन ढकालले पहिलो रक्तदाता प्रकाश ज्ञवालीलाई ब्लडब्याग हस्तान्तरण गरेर कार्यक्रम उद्घाटन गरे । कार्यक्रममा समाजका अध्यक्ष भानुभक्त भण्डारी, सचिव रुक्मागत पोखरेल, कार्यक्रम संयोजक विष्णु पाण्डे, रक्त सञ्चार केन्द्र पोखराका प्रमुख अर्जुन ज्ञवाली लगायतले रक्तदानको महत्वबारे प्रकाश पारेका थिए ।

समाजले प्रत्येक वर्ष नियमित रूपमा रक्तदान कार्यक्रम गर्दै आएको छ । नेपाल रेडक्रस सोसाइटी कास्की अन्तर्गतको रक्त सञ्चार केन्द्रको अनुरोधमा समाजले आकस्मिक रक्तदान कार्यक्रम गरेको हो ।