पोखरा ।
गण्डकी विश्वविद्यालयको न्यासिक परिषद अध्यक्ष डा दिनेशचन्द्र देवकोटाको बिदाइ गरिएको छ । नेकपा एमालेबाट बागमती प्रदेश सभा सदस्यका लागि समानुपातिक सूचीमा पर्नुअघि उनले राजीनामा गरेका थिए । उनी प्रदेश सभा सदस्य निर्वाचित भइसकेका छन् ।

विश्वविद्यालयको केन्द्रीय कार्यालय पोखरा मुस्ताङ चोकमा मंगलबार आयोजित कार्यक्रममा निवर्तमान अध्यक्ष देवकोटालाई बिदाइ गर्दै धन्यवाद ज्ञापन गरिएको हो । त्यस अवसरमा डा देवकोटाले आफू जहाँ रहे पनि गण्डकी विश्वविद्यालयको सहयोगी र शुभेच्छुक भइरहने प्रतिबद्धता जनाए ।

कुलपति प्राडा गणेशमान गुरुङ नेतृत्वको टिमको त्याग, समर्पण र इमान्दारीकै कारण विश्वविद्यालय गौरव गर्न लायक अवस्थामा आइपुग्न सफल भएको देवकोटाको भनाइ छ । कुलपति गुरुङले पनि न्यासिक परिषदको नेतृत्व गरी देवकोटाले विश्वविद्यालय सञ्चालनमा सहजीकरण गरेको स्मरण गरे ।

रजिस्ट्रार डा कैलाश तिमिल्सिनाले डा देवकोटासँग काम गर्दा निकै खुलापन र सकारात्मक वातावरण पाएको अनुभव सुनाए । डा देवकोटा नैतिकताको सवालमा निकै संवेदनशील पाएको उनको भनाइ छ । प्रदेश सामाजिक विकास तथा स्वास्थ्य मन्त्रालयका सचिव हेमराज सुवेदीले विश्वविद्यालयका लागि सरकारको तर्फ सधै साथ र सहयोग रहने बताए ।

उपकुलपति डा नवराज देवकोटाले कुलपति मुख्यमन्त्री नरही प्राज्ञिक कामको जिम्मेवारी प्राज्ञिक व्यक्तित्वलाई नै दिने गण्डकी विश्वविद्यालय नै नेपालको एकमात्रै विश्वविद्यालय रहेको बताए । न्यासिक परिषदका निवर्तमान अध्यक्ष डा देवकोटा प्राप्त जिम्मेवारीलाई इमान्दारीपूर्वक निर्वाह गर्ने व्यक्तित्व भएको उपकुलपति देवकोटाले बताए ।

विश्वविद्यालयको जनशक्ति व्यवस्थापन समितिका संयोजक प्राडा विश्वकल्याण पराजुलीले डा देवकोटा बागमती प्रदेश सभा सदस्य भएसँगै अन्तरप्रदेश सहयोग आदानप्रदान गर्न पाइने अपेक्षा सुनाए । विश्वविद्यालयका सहप्रशासक डोलराज सुवेदीले कार्यक्रम सञ्चालन गरेका थिए ।