मतगणना गर्ने जनशक्तिको व्यवस्थापन उच्च अदालतका रजिस्टारले गर्ने, मतगणना नतिजा आएपछि उच्च अदालत पोखराले सार्वजनिक गर्ने आदेश आएको छ । विष्णुप्रसाद आचार्य—उपरजिस्टार उच्च अदालत पोखरा

पोखरा ।

चुनावी परिणाम घोषणा भएको १० महिनापछि पोखरा १८ को मत गणना बदर भएको छ । गत वैशाख ३१ मा भएको स्थानीय निर्वाचन अन्तर्गत पोखरा १८ को मत गणना र मत परिणाम उच्च अदालत पोखरले बदर गरेको हो ।

मत परिणामका विषयमा शंका गर्दै परेको निवेदनमा सुनुवाई गर्दै अदालतले पुनः मतगणना गर्न भनेको छ । उच्च अदालत पोखराले मंगलबार यस्तो फैसला गरेको हो । अदालतले मतगणना गर्नमात्र फैसला गरेको छैन, गणना गर्ने दिन नै तोकिदिएको छ ।
मतगणनामा गडबडी गरिएको दाबी गर्दै पोखरा १८ मा वडाध्यक्ष पदका उम्मेदवार पुष्कल थापाले उच्च अदालत पोखरामा निवेदन दिएका थिए । एमालेका उम्मेदवार थापाले पुनः मतगणना गर्न माग गरेका थिए । सोही निवेदनउपर मंगलबार उच्च अदालत पोखराका कायम मुकायम मुख्यन्यायाधीश डिल्लीराज आचार्य र न्यायाधीश ऋषिराज आचार्यको संयुक्त इजलासले फेरि मतगणना गर्न आदेश दिएको हो ।

उच्चका उपरजिस्टार विष्णुप्रसाद आचार्यले मतगणना गर्ने जनशक्तिको व्यवस्थापन उच्च अदालतका रजिस्टारले गर्ने, मतगणना नतिजा आएपछि उच्चले सार्वजनिक गर्ने आदेश भएको जानकारी दिए । यसअघि विजयी घोषित वडाध्यक्षले काम गर्न पाउने÷नपाउने यकिन गर्न पूर्ण पाठ आउनुपर्ने उनले बताए । उपरजिस्टार आचार्यले भने, ‘अहिलेका वडाध्यक्षले काम गर्न÷पाउने नपाउने भन्ने कुरा पूर्ण पाठ आएपछि मात्र थाहा हुन्छ ।’

सो निर्वाचनमा पोखरा १८ मा नेपाली कांग्रेसको तर्फबाट उम्मेदवार बनेका शिवप्रसाद तिमिल्सिना ३ मतको अन्तरले विजयी भएका थिए । तिमिल्सिनाले १ हजार ६ सय ४३ मत पाउदा एमालेका पुष्कल थापाले १ हजार ६ सय ४० मत पाएका थिए ।
मतगणनाका क्रममा ९ मत गायब पारिएको दाबीसहित ३ मतले पराजित भएका थापाले पुनः मतगणना गर्न माग गरे पनि निर्वाचन समितिको कार्यालयले अस्वीकार गरेको थियो । त्यसपछि थापाले निर्वाचन आयोग, जिल्ला निर्वाचन कार्यालय कास्की, निर्वाचन अधिकृतको कार्यालय र विजयी वडाध्यक्ष तिमिल्सिनालाई प्रतिवादी बनाएर उच्चमा निवेदन दिएका थिए ।

अदालतले यस्ता प्रकृतिका मुद्दामा यति छिट्टै फैसला गरेको सम्भवतः यो नेपालकै पहिलो घटना हो । सामान्यतया यस्ता मुद्दा पाँचै वर्ष पूरा हुँदा पनि फैसला नभएका उदाहरण पनि छन् । यो निवेदनमा वादीको तर्फबाट कानुन व्यवसायीहरु हरि सुवेदी, सुरेन्द्र थापामगर र मदन तिवारीले बहस गरेका थिए ।

३ मतले पराजित भएका थापाले ५ भोट हराएको भएको भन्दै पुन मतगणना मागेर रिट हालेका थिए । त्यति बेला मुचल्कामा उल्लेख भएको भन्दा मतपेटिकामा भएको मतपत्र कम भएको भन्दै एमालेले मुख्य निर्वाचन अधिकृतको कार्यालयमा निवेदनसमेत दिएको थियो । पुनः मतगणना गर्नुपर्ने माग गर्दै एमाले गण्डकी प्रदेश अध्यक्ष नवराज शर्माले निवेदन दिए पनि पछि मुख्य निर्वाचन कार्यालयले नतिजा घोषणा गरेको थियो । त्यस बेला मुख्य निर्वाचन अधिकृत श्रीकृष्ण भट्टराई थिए ।

वडा १८ मा ४ हजार ३ सय ४८ मत खसेकोमा मतगणनाका क्रममा ९ मत कम अर्थात ४ हजार ३ सय ३९ मतपत्रमात्र भेटिएका थिए । मुचुल्का भएको भन्दा कम मत भएकैले पुनः मतगणनाका लागि निवेदन दिएको र अदालतमा पुगेको एमाले पोखरा महानगर अध्यक्ष दिलीप न्यौपाने बताउँछन् ।

मतपेटीका सुरक्षित छन्, आदेश अनुसार गर्छौं —प्रदेश निर्वाचन अधिकारी पराजुली
फेरि मतगणना गर्नुपर्ने आदेश भएको भन्ने समाचारहरु पढें । आधिकारिक रुपमा निर्वाचन कार्यालयलाई पत्र आएको छैन । आदेशमा के छ हेरेपछि सोही अनुसार अघि बढ्छौं ।
पुनः मतगणना भन्ने भए सोही अनुसार मतगणना हुन्छ । हामीले मतपेटिका सुरक्षित राखेका छौं । उहाँहरुसँग समन्वय गरेर काम गर्छौं । मतगणना अघिसम्म हालका वडाध्यक्षले काम गर्न पाउने÷नपाउने आदेशमा के छ, त्यो हेर्नुपर्छ । अहिलेसम्मको आधिकारिक वडाध्यक्ष उहाँ नै हो । आधिकारिक रुपमा आएपछि निर्वाचन आयोगसँग छलफल गरेर अघि बढ्छौं ।