पोखरा ।
पोखरा ११ फूलबारीमा रहेको शिवशक्ति माध्यमिक विद्यालयमा शिक्षक, कर्मचारी र विद्यालय व्यवस्थापन समितिको संयुक्त बैठक सोमबार भएको छ । बैठकले विद्यार्थीको शैक्षिक अवस्था सुधार गर्नका लागि २१ बुँदे आचारसंहिता बनाएको छ ।

आचारसंहिता पालनाले विद्यालयप्रति विद्यार्थी तथा अभिभावकको आर्कषण बढ्नेमात्र नभई विद्यालयको शैक्षिक स्तरमा थप सुधार हुने विश्वास गरिएको छ । विद्यालय व्यवस्थापन समिति अध्यक्ष दामोदर बास्तोलाको अध्यक्षतामा बसेको बैठकमा अन्तिम परीक्षाको नतिजाबारे पनि छलफल भएको थियो ।

सहायक प्रधानध्यापक बालकृष्ण बास्तोलाले विद्यालयको वर्तमान अवस्था र विद्यार्थीलाई आउँदा दिनमा कसरी सक्षम र सबल बनाउन सकिन्छ भन्ने विषयमा प्रकाश पारेका थिए । प्रधानाध्यापक शम्भुराज बास्तोलाले विद्यालय अंग्रेजी माध्ययमा गइसकेको तथा प्रविधिलाई आत्मसाथ गर्दै अब अगाडि बढ्ने बताए ।

उनले प्रत्येक शिक्षकले विद्यालयमा बालमैत्री वातावरण बनाउनुपर्ने जनाउँदै विद्यालय भर्ना अभियानलाई सशक्त रुपमा अगाडि बढाइने जनाए ।