जोमसोम ।
कालिगण्डकी पूर्वमा रहेको मुस्ताङको थासाङ गाउँपालिकाका ६ वटा गाउँ जोड्ने सडक स्तरोन्नति भइरहेको छ । संघीय निर्वाचन क्षेत्र अन्तर्गत एक निर्वाचन क्षेत्रको एक रणनीतिक महत्वको सडक अन्तर्गत भौतिक पूर्वाधार तथा यातायात मन्त्रालय अन्तर्गत सडक डिभिजन कार्यालय बाग्लुङले थासाङको ६ गाउँ जोड्ने सडक स्तरोन्नति सुरु गरेको हो ।

यो रणनीतिक महत्वको सडकका लागि यसअघि भौतिक योजना तथा यातायात मन्त्रालयले २०७७/०७८ मा कार्यक्रम स्वीकृत गरी ६० लाख बजेट विनियोजन गरेको थियो । थासाङ ३ लेतेको बेनी जोमसोम मुख्य राजमार्ग सडकबाट छयो, कुञ्जो, टिटी, धम्पु, कोखेठाटी र सौरु जोड्ने १० किमी सडक स्तरोन्नति तथा डिबिएसडी कालोपत्रको कामअघि बढाइएको हो । सडक स्तरोन्नतिसँगै थासाङका वडा २, ३, ४ र ५ सडक पहुँचमा जोडिने छन् ।

थासाङमा सदिंयौदेखि सडक नहुँदा आझेलमा परेको ६ गाउँ जोड्ने सडकका लागि तत्कालीन संघीय सांसद प्रेमप्रसाद तुलाचनले एक निर्वाचन क्षेत्र एक रणनीतिक महत्वको सडकका लागि पहल गरेका थिए । सडकको ०७८ मा विस्तृत परियोजना प्रतिवेदन (डिपीआर) गरिएको थियो । तर, डिपिआर बने पनि ठेक्का सम्झौता ढिलो भयो । सो सडकको १२ किमी स्तरोन्नति भनिए पनि हाल लेतदेखि कोखेठाँटीसम्म १० किमीको मात्र ठेक्का सम्झौता भएको छ ।

६ गाउँ जोड्ने रणनीतिक महत्वको संघीय योजनाका लागि ६० करोड लागत रहे पनि ३८ करोड ८८ लाख ६१ हजारमा सम्झौता भएको हो । महालक्ष्मी हिमाली जेभी काठमाडौं र डिभिजन सडक कार्यालय बागलुङबीच २०७९ पुस ७ गते सडकको ठेक्का सम्झौता भएको हो ।

२०८२ पुस ६ गते अर्थात् ३ वर्षभित्र निर्माण सम्पन्न गर्ने गरी ठेक्का सम्झौता भएको डिभिजन सडक कार्यालय बागलुङका इन्निियर प्रभात तिवारीले जानकारी दिए । थासाङका ६ गाउँ जोड्ने रणनीतिक महत्वको सडक ७ मिटर चौडा, कालोपत्रे, ५० सेमी सोल्जर र १ मिटर ड्रेनसहितको हुनेछ ।

गत पुसदेखि सडक स्तरोन्नति सुरु गरिएको यो सडकको ४ महिनामा २० प्रतिशत भौतिक प्रगति भएको डिभिजन सडक कार्यालय बाग्लुङका इन्जिनियर तिवारी बताउँछन् । उनले सडकमा ७ मिटर चौडा डिबिएसडी कालोपत्र गरिने जनाए । अहिले थासाङको टिटी र कुञ्जो क्षेत्रमा धमाधम काम भइरहेको उनले उल्लेख गरे ।

थासाङ गाउँपालिकाका २, ३, ४ र ५ वडा जोड्ने सडक नहुँदा त्यस क्षेत्रका स्थानीयलाई निकै सास्ती हुने गरेको गाउँपालिका उपाध्यक्ष सोमल हिराचन बताउँछन् । उनले रणनीतिक महत्वको सडकसँगै कालिगण्डकी नदीमा निर्माणाधीन लेते छयो र लेते धम्पु सडक पुल बन्नु जरुरी छ ।

सडक र पुल बनेमा त्यस क्षेत्रका स्थानीयलाई ठूलो राहत पुग्ने उपाध्यक्ष हिराचनको भनाइ छ । वर्षौदेखि कालिगण्डकी नदीको पीडा भोग्दै आएका त्यस क्षेत्रका बासिन्दा चाँडै सडक र पुल निर्माण सम्पन्न हुनेमा आशावादी छन् । उनीहरुले विभिन्न बहानामा विकासको काम अवरुद्ध हुन नहुनेमा जोड दिएका छन् ।

तत्कालीन संघीय सांसद तुलाचनले थासाङको कालिगण्डकी पूर्वको कालोपत्र सडक निर्माणपछि छयो, कुञ्जो, ताक्लुङ, टिटी, सिर्खुङ लगायतका स्थानीय लाभान्वित हुने बताए । सो क्षेत्रका गाउँमा पक्की पुल र सडकको पहुच नहुँदा निकै समस्यामा परेका स्थानीयको कृषि उपज केही वर्षपछि सहज ढुवानी र बजारीकरणमा समेत सहयोग पुग्ने सांसद तुलाचनको भना छ ।

थासाङका ६ गाउँ जोड्ने सडक नहुँदा त्यस क्षेत्रका कृषकहरुले उत्पादन गर्ने कृषि उपज बजारिकरण गर्न कठिनाइ छ । सडक र पुल एकैसाथ सम्पन्न भएमा त्यस क्षेत्रको कृषि उत्पादनको सहज बजारीकण गर्न सकिनेछ । सडक निर्माण पूरा भएमा एक गाउँबाट अर्को गाउँमा आउजाउ गर्न र कार्यालय, स्वास्थ्य संस्था र विद्यालयमा जानसमेत सजिलो हुनेछ ।