पोखरा ।
सन् २०२३ भित्र गण्डकी प्रदेशमा फोरजी सेवाको पहुँच ९२ प्रतिशत जनसंख्या माझ पुर्‍याउने लक्ष्यका साथ काम गरिरहेको नेपाल दूरसञ्चार प्राधिकरणले जनाएको छ ।

प्राधिकरणले हालै पोखरामा गण्डकी प्रदेशमा दूरसञ्चार सेवाको वर्तमान अवस्था र गुणस्तरका विषयमा सेवा प्रदायक र सरोकारवालाहरुको अन्तक्रिया गरेको थियो । त्यस क्रममा पहुँचको आधारमा २०२० सम्ममा प्रदेशका ४४ प्रतिशत जनसंख्यामाझ यो सेवा पुगिसकेको जानकारी गराइयो ।

‘२०२२ सम्म गण्डकीमा एनसेलको ४९० टावरहरु थिए र २०२३ को अन्त्यसम्ममा यो संख्या ५०६ पुग्ने छ,’ अन्तक्र्रिया भनियो, ‘एनसेलको कुल टावरको १२ प्रतिशत टावर गण्डकीमा छ ।’ गण्डकी प्रदेशको योगदान एनसेलको भ्वाइस सेवामा ९.५ प्रतिशत र डाटामा १० प्रतिशत रहेको छ । एनसेलको कुल ग्राहक संख्यामा गण्डकी प्रदेशको योगदान १० प्रतिशत छ ।

सेवा विस्तारका लागि थप १६ टावरहरु जडान गर्ने योजना रहेको छ । अन्नपुर्ण आधार शिविर क्षेत्र, लेक साइड लगायत स्थानहरुमा सेवा विस्तारका लागि नयाँ टावरहरु जडान गर्न ढिला भइसकेको छ र त्यसका लागि सरोकारवालाहरुको सहजीकरण चाहिएको प्राधिकरणले औंल्याएको छ ।