पोखरा ।
साहित्यकार रामचन्द्र आचार्य (आरसी) को कथासञ्चयन ‘सती’ सार्वजनिक भएको छ । पूर्व बैंकर आरसीको यो पहिलो कृति हो ।
कस्केली अधिकृत समाजद्वारा शनिबार आयोजित समारोहमा नेपाल संगीत तथा नाट्य प्रज्ञा प्रतिष्ठानका पूर्व कुलपति सरुभक्तले कृति सार्वजनिक गरे । सहित्यकार सरुभक्तले कथाकार आरसी आख्यानकारका रुपमा उदाएको जनाउँदै नेपाली आख्यानमा नयाँ नयाँ अनुहार आएकोमा प्रशन्नता व्यक्त गरे ।

प्राज्ञ हरिदेवी कोइरालाले साहित्य, कलाको योगदानलाई राज्य सञ्चालकले यथार्थ मूल्यांकन गर्न नसकेको गुनासो गरिन् । प्राडा जगन्नाथ रेग्मीले आरसीका कथामा सामाजिक यथार्थ प्रस्तुत भएको उल्लेख गरे ।

कस्केली अधिकृत समाजका अध्यक्ष चन्द्रबहादुर सुवेदीको अध्यक्षतामा भएको कार्यक्रममा कथाकार आरसीले वैदेशिक रोजगारीले ल्याएका विग्रह, उपभोक्तावादी संस्कारका पीडा, विभिन्न खालका भेदभाव जस्ता सामाजिक विषयलाई कथामा समेटेको जनाए । तीन सय रुपैयाँ मूल्य रहेको कृतिमा १३ वटा कथा छन् ।

कार्यक्रममा अन्तर्राष्ट्रिय नेपाली साहित्य समाज गण्डकी प्रदेश अध्यक्ष दुर्गाबहादुर शाह (बाबा), पत्रकार रमेश पौडेल, अनेसास सचिव असफल गौतम, संस्थाका सचिव महेश पौडेलले लगायतले बोलेका थिए ।