जोमसोम— हिमाली जिल्ला मुस्ताङमा पहिलो पटक विश्व उपभोक्ता अधिकार दिवस मनाईएको छ । दिवसको अवसरमा शुक्रबार मुस्ताङ सदरमुकाम जोमसोम बजारमा ब्यानर र प्लेकार्डसहित प्रभातफेरी गरिएको हो ।

पर्यटन तथा उद्योग कार्यालय मुस्ताङको आयोजनामा ‘स्वच्छ र प्रतिस्पर्धी बजार, उपभोक्ताको सार्वभौम अधिकार’ नारासहित अधिकार दिवस मनाईएको हो । दिवसमा जिल्ला प्रशासन कार्यालयले सहकार्य गरेको थियो । दिवसमा मुस्ताङ अस्पताल, स्वास्थ्य कार्यालय,सुरक्षा निकाय,पूर्वाधार विकास कार्यालय,जनहित माध्यमिक विद्यालय,घरपझोङ गाउँपालिका ,पत्रकार र विद्यार्थीहरुले उपस्थित जनाएका थिए ।

दिवसको अवसरमा जनहित माध्यमिक विद्यालय जोमसोमको हातामा आयोजित विद्यार्थी सचेतना कार्यक्रममा पर्यटन तथा उद्योग कार्यालयका प्रमुख प्रेमप्रसाद पौडेलले उपभोक्ता अधिकार दिवस संम्वन्धि कार्यपत्र प्रस्तुत गरेका थिए ।

यसैगरी मुस्ताङका सहायक प्रजिअ रामप्रसाद सुवेदीले उपभोक्ता अधिकार र वस्तु तथा सेवा प्रवाहका बिषयमा विद्यार्थीहरुलाई सचेतना कक्षा संञ्चालन गरेका थिए ।

सहायक प्रजिअ सुवेदीले सेवा प्रदायक संस्था र सेवाग्राहीले उपभोक्ता अधिकारलाई आत्मसाथ गर्नुपर्ने बताए ।