पोखरा ।

गण्डकी प्रदेशको मुख्यमन्त्रीमा प्रदेश प्रमुख डिल्लीराज भट्टले एमाले संसदीय दलका नेता खगराज अधिकारीलाई नियुक्त गरेपछि नेपाली कांग्रेस त्यसविरुद्ध सर्वोच्च अदालत जाने भएको छ ।

कांग्रेस संसदीय दलका नेता सुरेन्द्रराज पाण्डेले अधिकारीलाई नियुक्त नगर्न आजै आग्रह गरेका थिए । तर उनको आग्रह विपरीत अधिकारी नियुक्त भए । अधिकारीको नियुक्ति गैरसंवैधानिक हुने नेपाली कांग्रेस संसदीय दलको ठहर थियो ।

निवर्तमान मुख्यमन्त्री तथा कांग्रेस संसदीय दलका नेता पाण्डे आजै सर्वोच्च अदालत पुगेर अधिकारीको नियुक्ति विरुद्ध रिट हाल्ने तयारीमा छन् । त्यसका लागि उनी मुख्यमन्त्री निवासबाट पोखरा विमानस्थल पुग्दैछन् ।

यसअघि अधिकारीले आजै मुख्यमन्त्रीमा दाबी प्रस्तुत गरेका थिए । त्यसपछि नियुक्ति रोक्न प्रदेश प्रमुखसँग पाण्डेले भेट तय गरेका थिए । तर भेटघाट अघि नै अधिकारी मुख्यमन्त्री नियुक्त भए । भेट रद्द गरी पाण्डेले आफ्नै सरकारी निवासमा कानुन व्यवसायीसँग परामर्श गरे । सोही परामर्शपछि उनी काठमाडौं उड्दै छन् ।