पोखरा । पोखरा महानगर १२ नम्बर वडा कार्यालयको नेतृत्वमा मंगलबारदेखि पोखरामा विशेष बजार अनुगमन सुरु भएको छ ।

वडाध्यक्षको नेतृत्वमा पोखरा १२ का विभिन्न उपभोक्तासँग प्रत्यक्ष जोडिने व्यावसायिक स्थलहरुमा अनुगमन गरिएको छ ।

बजारमा अस्वभाविक भइरहेको मूल्यवृद्धि र अखाद्य मिसावटविरुद्ध वडाले विशेष अनुगमन सुरु गरेको हो । यस अन्तर्गत विशेषगरी दैनिक उपभोग्य वस्तुका ठूला विक्रेतादेखि खुद्रा विक्रेताहरुकोमा वडा अध्यक्षको अनुगमन टोली पुग्नेछ ।

मुख्यरुपमा बजारमा भइरहेको कालोबजारी, अखाद्य वस्तुको बिक्री वितरण, अस्वभाविक मूल्यवृद्धि, मिसावट, मिति नाघेका खाद्य पदार्थको बिक्री वितरण नियन्त्रण गर्नेगरी अनुगमन सुरु गरिएको वडाध्यक्ष सन्तोष बास्तोलाले जानकारी दिए ।

उपभोग्य वस्तको गुणस्तरहीनता र जुनसुकै बाहनामा भइहरको कालोबजारीलाई निरुत्साहित गर्न विशेष अनुगमनका लागि महानगरपालिले वडालाई निर्देशन दिएको थियो । चाडपर्व नजिकिँदै गर्दा बजारमा अभावको कारण देखाउँदै मूल्य बढाउने क्रम तीव्र भएको छ । जसका कारण उपभोक्ता मारमा परेका छन् ।