पोखरा ।

कास्कीको पोखरा महानगरपालिका-४, नालामुखबाट एक १२ वर्षीय बालक बेपत्ता भएका छन्। जिल्ला प्रहरी कार्यालय, कास्कीले बालकको खोजी कार्यमा सहयोग गरिदिन सर्वसाधारणलाई अपिल गरेको छ।

म्याग्दी जिल्ला, मंगला गाउँपालिका वडा नं. १ स्थायी घर भई हाल पोखरा-४ नालामुखमा बस्दै आएका १२ वर्षीय विकल खाती असार २७ गते दिउँसो ४ बजेदेखि सम्पर्कविहीन भएका हुन्।

बालकका बुवा ४० वर्षीय बुद्धिबहादुर खातीले छोरा हराएको भन्दै खोजतलासका लागि असार २८ गते जिल्ला प्रहरी कार्यालय, कास्की (महिला, बालबालिका तथा जेष्ठ नागरिक सेवा केन्द्र) मा निवेदन दिएका थिए।

निवेदन प्राप्त भएलगत्तै प्रहरीले बालकको खोजी कार्य सुरु गरेको जनाएको छ। प्रहरीले एक सूचना जारी गर्दै बालक विकल खातीलाई कतै देखेमा वा उनीबारे कुनै जानकारी प्राप्त भएमा नजिकैको प्रहरी कार्यालय वा नेपाल प्रहरीको फोन नम्बर १००, १०४ मा सम्पर्क गरी सहयोग गरिदिनुहुन सबैमा अनुरोध गरेको छ।