काठमाडौं ।
जनकविकेशरी धर्मराज थापालाई उनको १०१औँ जन्मजयन्तीको अवसरमा गीत-सङ्गीत र कृति लोकार्पणसहित सम्झना गरिएको छ। जनकविकेशरी धर्मराज–सावित्री थापा प्रतिष्ठानले बिहीबार काठमाडौँमा आयोजना गरेको कार्यक्रममा उनको योगदानको स्मरण गरियो।

कार्यक्रमको प्रमुख आकर्षणका रूपमा थापाद्वारा वि.सं. २०१० सालमा स्थापित अनुसन्धानमूलक लोकसाहित्यिक पत्रिका ‘डाँफेचरी’को विशेष अंक लोकार्पण गरियो। प्रतिष्ठानका अध्यक्ष मदनराज थापाले जनकविकेशरीले देशका विभिन्न स्थानमा पुगेर सङ्कलन गरेका लोकगीत र त्यस क्रममा भोगेका अनुभवलाई लिपिबद्ध गर्ने काम प्रतिष्ठानले गरिरहेको जानकारी दिए।

‘डाँफेचरी’का अनुसन्धान सल्लाहकार प्रा.डा. दयाराम श्रेष्ठले पत्रिकामा लोकसाहित्य र लोकगीतसम्बन्धी अनुसन्धानात्मक लेखहरू समेटिएकाले यसले लोकवार्ता बुझ्न महत्त्वपूर्ण अवसर प्रदान गर्ने बताए।

कार्यक्रममा संस्कृतिविद् डा. जगमान गुरुङले पुराना दिनको स्मरण गर्दै लोकगीत सङ्कलनका लागि धर्मराज थापा पोखराबाट सात दिन हिँडेर काठमाडौँ आइपुगेको प्रसङ्ग सुनाए। उनले भने, “तत्कालीन राजा महेन्द्रले राज्याभिषेकको अवसरमा थापाले गाएको गीतबाट प्रभावित भएर नै उहाँलाई ‘जनकविकेशरी’को पदवी दिएका थिए।”

पूर्वमन्त्री राधाकृष्ण मैनालीले जनकविकेशरीले देशभरका लोकगीतको सङ्कलन र उत्थानमा पुर्‍याएको योगदानले नेपाली लोकसंस्कृतिलाई बचाउन मद्दत पुगेको विचार व्यक्त गरे। लेखक रतन भण्डारीले थापाको व्यक्तित्वबारे चर्चा गरेका थिए।

समारोहमा गायिका सीता श्रेष्ठ, विकासजङ्ग राणालगायतका कलाकारहरूले जनकविकेशरीका कालजयी लोकगीतहरू प्रस्तुत गर्दै उनलाई सांगीतिक श्रद्धाञ्जली अर्पण गरेका थिए।