पोखरा । सरकारले विभिन्न निकायमा कार्यरत ७२ सहसचिवको सरुवा गर्दा गण्डकीका सचिवहरु फेरिएका छन् । प्रदेशको बजेट बनाउने बेला आर्थिक मामिला सचिव रहेका राजेन्द्रदेव पाण्डेलाई सरकारले नेपाल ट्रस्टको कार्यालय पठाएको छ ।

पोहोर धादिङको राजमार्गमा पहिरोमा ३ वटा गाडी पुरिएका बेला पाण्डे त्यहीका प्रमुख जिल्ला अधिकारी थिए । घटनालगत्तै तानिएका उनलाई गण्डकीमा पठाइएको थियो । पहिला सामाजिक विकास मन्त्रालयमा सचिव रहेका उनलाई आर्थिक मामिला मन्त्री डा टकराज गुरुङको पहलमा अर्थ सचिव बनाइएको थियो । तर उनै पाण्डेले आफ्नो गृह पालिका तनहुँको भानुमा बजेटको ओइरो हालेपछि उनी विवादमा तानिएका थिए ।

संसदको बैठकमा खोजी हुँदा पनि नदेखिएका उनले उल्टै अघिल्ला वर्षहरुमा भानु नगरपालिकाले प्रदेशको बजेट नपाएकाले यसपालि क्षतिपूर्ति भरण भएको प्रतिक्रिया दिएका थिए । उक्त विवादपछि उनलाई मुख्यमन्त्री तथा मन्त्रिपरिषदको कार्यालयमा तानिएको थियो । यता तानिएलगत्तै बिदामा बसेका उनलाई अहिले सरकारले सरुवा गरेको हो ।

यसैगरी मुख्यमन्त्री तथा मन्त्रिपरिषद्को कार्यालय गण्डकीका २ सचिव पनि सरुवा भएका छन् । बाबुराम गौैतमको गृह मन्त्रालय वा मातहत र केशवराज ढकालको राष्ट्रिय प्राकृतिक स्रोत तथा वित्त आयोगमा सरुवा भएको छ ।

मुख्यमन्त्री तथा मन्त्रिपरिषद्को कार्यालय गण्डकीमा भक्तपुरका प्रजिअ रमेश ढकाल आउने भएका छन् । मुख्यमन्त्री तथा मन्त्रिपरिषद्को कार्यालय गण्डकीमा यसअघि प्रमुख सचिववाहेक ३ सचिवको दरबन्दी रहेकामा अहिले पुनर्संरचना हुँदा २ जनामा झारिएको छ । अब उक्त कार्यालयमा कानुनका १ र प्रशासनका १ सचिव रहनेछन् ।

यसैगरी प्रदेश नीति तथा योजना आयोगका सचिव टंक पाण्डेको अर्थ मन्त्रालयमा सरुवा भएको छ । उनी अर्थकै क्याडर हुन् । गण्डकीकै वन तथा वातावरण सचिव जीवनाथ पोडेलको मधेश प्रदेशमा सरुवा हुँदा गण्डकीमा मोहनराज काफ्ले आउने भएका छन् ।

गण्डकीकै मुख्यमन्त्री तथा मन्त्रिपरिषदको कार्यालयमा स्वास्थ्य मन्त्रालयबाट ऋषिराज आचार्यको सरुवा भएको छ । प्रदेशको पशुपंक्षी निर्देशनालयमा कार्यरत सहसचिव प्रेरणा सेढाईको संघको कृषि मन्त्रालयमा सरुवा भएको छ ।

पोखराको प्रमुख प्रशासकीय अधिकृतमा लोकसेवा आयोगको कार्यालय जलेश्वरमा कार्यरत मुक्तिराम अर्याल आउने भएका छन् ।