पोखरा ।  पोखरा महानगरपालिकाले जिल्ला प्रशासन कार्यालय कास्की परिसरमा आप्रवासी सहायता स्रोत केन्द्र सञ्चालनमा ल्याएको छ । वैदेशिक रोजगारीमा जान राहदानी बनाउनेहरूलाई लक्षित गरी स्थापना गरिएको केन्द्रको महानगर प्रमुख धनराज आचार्यले शुभारम्भ गरे ।

केन्द्रले विदेश जानुअघि आवश्यक परामर्श दिने महानगर प्रमुख आचार्यले बताए । उनका अनुसार, वैदेशिक रोजगारीमा रहेका व्यक्तिका परिवारलाई वित्तीय साक्षरतासम्बन्धी परामर्शसमेत दिइनेछ ।

प्रमुख जिल्ला अधिकारी रुद्रादेवी शर्माले राहदानी शाखा नजिकै कक्ष स्थापना भएकाले परामर्श दिन सहज हुने बताइन् । उनले सेवाग्राहीको सुविधाका लागि महानगरपालिकाले गरेको सहयोगको प्रशंसा गरिन् ।

सेवाग्राहीका लागि विश्राम गर्ने फल्चासहितको सहायता कक्ष निर्माणमा महानगरपालिकाले १६ लाख रुपैयाँ खर्च गरेको छ ।

महानगरपालिकाका रोजगार संयोजक विष्णुप्रसाद दाहाल र सुरक्षित आप्रवासन कार्यक्रम (सामी) का जिल्ला संयोजक आदिमध्वज श्रेष्ठले श्रम तथा रोजगार क्षेत्रमा समन्वय गरिरहेका छन् ।