पोखरा । टिकटक भिडियो बनाउन बारा जिल्लाको दुधौरा खोलामा हामफालेका एक युवक बाढीले बगाउँदा बेपत्ता भएका छन् । प्रसौनी गाउँपालिका–२ का २१ वर्षीय बिक्की गोसाई शनिबार दिउँसो खोलामा आएको बाढीले बगाएर बेपत्ता भएका हुन् ।

स्थानीयका अनुसार गोसाई आफ्ना साथी अनुराग केशरीसँग टिकटक भिडियो खिच्ने उद्देश्यले खोलामा हामफालेका थिए । तर बाढीको वेग बढेपछि उनी पौडिन नसकी बगाएका हुन् । साथमा रहेका अनुराग केशरी भने पौडेर सुरक्षित रूपमा किनारमा निस्किन सफल भएका छन् ।

बेपत्ता गोसाईको खोजीका लागि प्रहरीले स्थानीयवासीको सहयोगमा खोलामा व्यापक खोज अभियान सुरु गरेको छ । लगातारको वर्षाका कारण खोलाको बहाव तीव्र भएपछि खोज कार्यमा कठिनाइ भएको प्रहरीले जनाएको छ ।