काठमाडौं । जेन–जी आन्दोलनका क्रममा घाइते भएका ५६ जनालाई नेपाल सरकारले आधिकारिक घाइते परिचयपत्र वितरण गरेको छ । आइतबार राष्ट्रिय ट्रमा सेन्टरमा आयोजित कार्यक्रममा थप तीन जनालाई परिचयपत्र वितरण गरिएको जिल्ला प्रशासन कार्यालय काठमाडौंका सहायक प्रमुख जिल्ला अधिकारी तथा प्रवक्ता मुक्तिराम रिजालले जानकारी दिए ।

‘अस्पतालमा उपचाररत, घरमै बेडरेस्टमा रहेका र आउन सक्ने अवस्थाका आन्दोलनकारीहरुलाई परिचयपत्र वितरण गरेका छौं,’ रिजालले सञ्चारकर्मीहरूसँग भने, ‘अहिलेसम्म ५६ जनालाई सरकारले निर्णय गरेअनुसार २० हजार रुपैयाँ राहत र घाइते परिचयपत्र वितरण गरिसक्यौं ।’

उनका अनुसार आइतबार ट्रमा सेन्टरमा तीन जनालाई कार्ड वितरण गरिएको हो । बाँकी घाइतेहरुको विवरण संकलन भइरहेकाले चाँडै सबैलाई कार्ड वितरण गर्ने तयारी भइरहेको पनि उनले बताए ।

सरकारले गत भदौ २३ र २४ गतेको जेन–जी आन्दोलनका क्रममा घाइते भएकाहरुलाई राहत, उपचार र पहिचानका उद्देश्यले परिचयपत्र वितरण सुरु गरेको हो ।

तर कार्ड प्राप्त गरेका घाइतेहरुले अन्तरिम सरकारले वाचा गरेअनुसार राहत र उपचारमा चासो नदेखाएको गुनासो गरेका छन् । उनीहरूले देशभर सयौं आन्दोलनकारी अझै उपचाररत रहे पनि राज्यले पर्याप्त ध्यान नदिएको आरोप लगाएका छन् ।