पोखरा ।
अधिकांश नेपालीको दिनचर्या बिहानको चियाबाट सुरु हुन्छ । चिया र हाम्रो नजिकको साइनो छ । चिया नेपाली संस्कार हो । कहीँ पाहुना जाँदा वा कोही आउँदा चियाले नै सत्कार गरिन्छ । त्यति मात्र होइन कुनै भेटघाट वा जमघटमा पनि चिया पिउनु अनिवार्य झैँ बनेको छ ।

पोखरा महानगरपालिका कार्यालयको अपोजिट साइट नयाँ बजार जाने गल्लीमा रहेको पोखरेली चिया स्पोटले साथीभाइसँगको भेटघाट र चियाको सम्बन्धलाई झन् नजिक बनाइदिएको छ । चिया स्पोट पोखरा पामेकी २५ वर्षीया मञ्जु चापागाईंले खोलेकी हुन् । स्नातक तहकाे पढाई सकेर व्यवसाय गर्ने सोच आएकाले चिया पसल खोलेकी उनले बताइन् ।

उनी आफुलाई पनि चिया मन पर्ने भएकाले खाली ससमयको सदुपयोग गर्न चिया पसल खोल्ने सोच आएको उनको भनाइ छ । डेढ महिना अघि उनकी बहिनी अञ्जु चापागाईं र उनी मिलेर चिया पसल खोलेका हुन् । चिया पसल राम्रै चलिरहेको छ । चिया बनाउन लोकल दुध प्रयोग गरिने उनले जानकारी दिइन् । चियाका साथै झानेको करेन्ट चाउचाउ ग्राहकले मन पराएकाे उनी बताउँछिन् । पोर्क मम, सुकुटी सेट, कोन लस्सि यहाँका स्पेशल हुन् ।

पोखरामा विभिन्न ठाउँमा चिया पसलहरु छन् । तर, अरु भन्दा फरक ढंगले चिया पसल सञ्चालन गर्ने सोच आएको सुनाउँदै चापागाईं भन्छिन्, ‘हाम्रो स्पेशल भनेको मसला र मट्का चिया हो । अरु भन्दा अलि फरक र अनौठो बनाउनका लागि राम्रो नाम राखौँ र युनिक स्वाद दिउ भन्ने भयो ।’

चिया पसलमा धेरै लगानी पनि नलाग्ने भएकाले यसमा चासो गयो । भाडाहरु किन्न र डेकोरेशन गर्न चाहिँ खर्च भयो । उनका अनुसार चिया स्पोटको मुख्य विशेषता भनेको चियाको स्वाद र यहाँको वातावरण हो । भित्तामा टाँसिएका बाँसले पसललाई झनै आकर्षक बनाएकाे छ । चियाकाे चुस्कीसँग साथीसँग गफ पाइन्छ ।

चिया नेपालीहरुको पुरानो कल्चर भएकाले पनि नेपाली समाजमा चियाको क्रेज बढेको उनी सुनाउँछिन् । ‘पाहुना आउँदा पनि पहिले चिया नै दिइन्छ । साथी भाइ भेट्दा पनि चिया नै खाइन्छ । चिया खाने चलन घरदेखि नै बसेको बानी भएकाले पनि यसको क्रेज बढेको हो,’ उनले भनिन् ।

मञ्जुको चिया स्पोटमा १२ थरीका चिया पाइन्छन् । बिहान ७ देखि बेलुका ८ बजेसम्म खुल्ने यहाँ दैनिक १०/१५ हजार कारोबार हुन्छ ।

अहिलेको पुस्ताहरु राम्रो ठाउँ खोज्ने, मिठो र नयाँ स्वाद खोज्ने, अलिकति डेकोरेशन भएको ठाउँहरू रोज्ने भएकाले चियाको क्रेज बढेको छ । ग्राहकहरूले चियामा पनि धेरै भेराइटीहरु खोज्न गरेको उनको अनुभव छ । फरक स्वाद र रमाइलो वातावरणमा बसेर चिया पिउन मन पराउनेहरू धेरै छन् । त्यसैलाई मध्यनजर गरेर चिया पसल खोलेको उनले सुनाइन् ।

उनका अनुसार चिया स्पोटमा विशेष गरी १२ भेराइटीका चिया पाइन्छन् । उनले दैनिक १०/१५ हजार आम्दानी हुने जानकारी दिइन् । पसल बिहान ७ बजेदेखि रातिको ८ बजेसम्म चल्छ । मञ्जु मोटोभ्लग पनि गर्छिन् । उनी मोटरसाइकलमा देशका विभिन्न कुनाकाप्चा पुगेकी छन् । उनको यात्राको सुरुआत एउटा साधारण रुचिबाट भएको हो तर त्यो रहर अहिले उनको परिचयको बनेको छ ।

पहिलो पटक उनले पोखराबाट मुस्ताङसम्मको यात्रा गरेकी थिइन् । त्यसपछि उनले ढोरपाटन, रुकुम जनकपुर, भारतको दिल्ली, केदारनाथसम्म मोटरसाइकलमा यात्रा गरिसकेकी छिन् । उनले कहिले एक्लै बाटो समाउँछिन् भने कहिलेकाहीँ गल्र्स ग्रुपसँग पनि यात्रा गर्छिन् । महिलाहरु पनि साहसिक यात्रामा निस्कनुपर्ने उनको चाहना छ । आत्मविश्वास भएमा जस्तो पनि काम गर्न सकिने उनको धारणा छ ।

चिया पसल खोलेर व्यवसाय सञ्चालन गर्न चाहनेहरूका लागि चियाको ठुलो बजार रहेको उनी बताउँछन् । मञ्जु भन्छिन्, ‘चिया पसल खोलेर व्यवसाय गर्नेहरुको लागि नेपालमा अझै पनि चियाको बजार ठुलो छ । चिया व्यवसायमा अवसर पनि छ । प्रतिस्पर्धाको रुपमा भन्दा पनि अवसरको रूपमा हेर्ने हो भने चिया व्यवसाय राम्रो छ ।’