नवलपुर ।
भदौ २३ र २४ गते भएको जेनजी आन्दोलनका क्रममा आगजनी, तोडफोड र लुटपाटमा संलग्न व्यक्तिहरूलाई कारबाहीको माग गर्दै नवलपुरका जनप्रतिनिधिहरूले बुधबार किटानी जाहेरी दिएका छन् । मध्यविन्दु नगर प्रमुख भीमलाल अधिकारीको नेतृत्वमा जिल्ला प्रहरी कार्यालयमा पुगेको जनप्रतिनिधिहरूको टोलीले प्रहरी प्रमुख युवराज खड्कासमक्ष जाहेरी बुझाएको हो ।

यस टोलीमा हुप्सेकोट गाउँपालिका अध्यक्ष लक्ष्मी पाण्डे, उपाध्यक्ष पूर्णसिंह राना, मध्यविन्दु उपप्रमुख पूर्णकला चौधरीसहित वडाध्यक्षहरू, सदस्यहरू र सामाजिक अगुवाहरु संलग्न थिए ।

मध्यविन्दु नगर प्रमुख अधिकारीले भदौ २३ र २४ गतेको जेनजी आन्दोलनका क्रममा केही अराजक समूह, उद्दण्ड व्यक्तिहरूले राजनीतिक प्रतिशोध साँधेर सरकारी कार्यालय र निजी सम्पत्तिमा आगजनी, तोडफोड र लुटपाट मच्चाएको बताए । उनले यस्ता गतिविधि कुनै आन्दोलन नभई हिंसा रहेको भन्दै यथाशीघ्र त्यस्ता कार्यमा संलग्नहरुलाई कानुनी दायरामा ल्याउनुपर्नेमा जोड दिए ।

आन्दोलनका क्रममा भएका अमानवीय र आपराधिक क्रियाकलापले जनप्रतिनिधि मात्रै नभई प्रहरी र प्रशासन समेतको मनोबल गिरेको अधिकारीको भनाइ छ । यदि त्यस्ता आपराधिक काममा संलग्नलाई कारबाही नगरी मौन बसेमा स्थानीय सरकारले सेवा प्रवाह गर्न नसक्ने र प्रहरी प्रशासनले समेत सुरक्षा दिन नसक्ने उनको तर्क थियो । नगर प्रमुख अधिकारीले सही ढङ्गबाट अनुसन्धान गरी प्रमाण पुगेकालाई कानुन बमोजिम कारबाही गर्न अनुरोध गरे ।

जाहेरी बुझेपछि प्रहरी प्रमुख युवराज खड्काले अपराधमा संलग्न कुनै पनि व्यक्ति उम्कन नसक्ने बताए । उनले प्रचलित कानुन बमोजिम कारबाही हुने र जाहेरीका आधारमा अनुसन्धान सुरु गरी प्रत्यक्ष संलग्नहरूलाई कारबाही गर्ने जानकारी दिए ।

अनुसन्धानमा बाधा पुग्ने भएकाले अहिले किटानी जाहेरी परेकाहरुको नाम र ठेगाना गोप्य राखिएको प्रहरी प्रमुख खड्काले बताए । घरमा आगजनी, लुटपाट र तोडफोड गर्नेहरूको फोटो, भिडियो, सामाजिक सञ्जालका स्टाटस लगायतका प्रमाणसहित किटानी जाहेरी दिइएको मध्यविन्दु नगर प्रमुख अधिकारीले जानकारी दिए । उनले आपराधिक कार्यमा प्रत्यक्ष संलग्न रहेका र उनीहरुलाई सघाउने, उक्साउने लगायत सबैलाई कारबाहीको माग गरेर किटानी जाहेरी बुझाएको बताए ।