पोखरा ।

गोरखाको चुमनुब्री १ स्थित पाङबारी हिमालमा बेपत्ता भएका दुई इटालियन नागरिकको पाँच दिनपछि शव फेला परेको छ । मंगलबार पाङबारी हिमालको पहिलो शिविरमा इटालीका ६७ वर्षीय स्तेफानो फरिनातो र ३७ वर्षीय अलेस्सान्द्रो गापुटोको शव फेला परेको जिल्ला प्रहरी कार्यालय गोरखाले जनाएको छ ।

उनीहरु हिउँले पुरिएको अवस्थामा फेला परेको गोरखा प्रहरीले जानकारी दिएकाे छ ।

७००५ मिटर अग्लो पाङबारी हिमालबाट फर्कने क्रममा तीन इटालियन र एक नेपाली सहयोगी गत हप्ताको बुधबारदेखि पहिलो शिविर र आधार शिविरमा अलपत्र परेका थिए ।

आधार शिविरमा ६७ वर्षीय स्तेफानो फरीनातो र ३७ वर्षीय अलेस्सान्द्रो गापुटो हिमालको पहिलो शिविरमा फसेको प्रहरीको भनाइ छ । हिमाल आरोहण गर्न नसकी फर्कने क्रममा हिमपातले बाटो अवरुद्ध भएर उनीहू फसेका थिए ।

५००० मिटर उचाइमा अवस्थित पाङबारी हिमालको बेसक्याम्पमा फसेका ६५ वर्षका भेल्टर पेरलिनोको भने आइतबार बिहान १० बजे हेलिकोप्टरबाट उद्धार गरिएको थियो । बेसक्याम्पमा रहेका पेम्बा रेञ्जी शेर्पा, दावा छिरी शेर्पा र पासाङ तामाङको पनि हेलिकोप्टरबाट उद्धार गरी उपचारका काठमाडौं पठाएको प्रहरीको भनाइ छ ।