जोमसोम–मुस्ताङ जिल्ला अस्पतालमा आईतबारदेखि पूनः आकस्मिक प्रसूति शल्यक्रिया सेवा संञ्चालनमा ल्याईएको छ ।
चालुवर्ष २०७९÷०८० देखि पहिलो पटक संञ्चालनमा ल्याईएको आकस्मिक प्रसूति संम्वन्धि शल्यक्रिया सेवा जनशक्ति अभाव हुँदा प्रभावित बनेको थियो ।
सुरुआती चरणमा शल्यक्रिया सेवा संञ्चालनमा ल्याईएको भएपनि मुस्ताङ अस्पतालमा कार्यरत एमडीजीपी डा. कुन्दन कर्ण कारणवश अस्पताल छोडेर बिदा भएसंगै शल्यक्रिया सेवा बन्द भएको थियो । अस्पतालका मेडिकल सुपरिटेन्डन डा. विशाल तिवारीको पहलमा पूनः एमडीजीपी डाक्टरको व्यवस्था गरिएसंगै ३ महिनापछि आकस्मिक प्रसूति शल्यक्रिया सेवा संञ्चालनमा आएको हो ।
अस्पतालले मनाङ अस्पतालमा कार्यरत एमडीजीपी डा. मुखिया घलेलाई आपसी सम्झौता र सहमतीमा नियूक्त गरेसंगै पूनः आकस्मिक प्रसूति सेवा संञ्चालनमा आउन सकेको अस्पतालका मेसु डा. विशाल तिवारीले जानकारी दिए । नयाँ नियुक्त भएका एमडीजीपी डा. मुखिया घलेले दुर्गमको जिल्लामा बसेर सेवा गर्ने आंकाक्षा स्वरुप मुस्ताङलाई प्राथमिकतामा राखेर यहाँ सेवा दिन आईपुगेको जनाए ।
मुस्ताङमा आकस्मिक प्रसूति शल्यक्रिया सेवा पून ः संञ्चालनमा आएसंगै यहाँका महिलाहरु उत्साहित भएका छन् । सामान्य प्रसूति देखि अप्रेसननै गर्नुपर्ने प्रसूति महिलालाई सुरक्षित सुत्केरी गराउन योगदान पुग्ने बताईएको छ । भौगोलिक विकटता र सुगमको अस्पतालसम्म लैजान निकै समय लाग्ने भएकाले जिल्लामा सुरक्षित शल्यक्रिया मार्फत सुत्केरी गराउने अवसर पाउँदा जिल्लाका गरिव तथा विपन्न बर्गलाई निकै राहत पुग्ने अस्पतालका मेसु डा. विशाल तिवारीको भनाई छ ।

२०३१ सालमा स्थापना भएको मुस्ताङ जिल्ला अस्पताल संघीयतापछि गण्डकी प्रदेश सरकारको मातहतमा २५ शैया क्षमतामा स्तर वृद्धि गरिएको हो । यसअघि अस्पतालमा श्रोतसाधन र जनशक्ति अभाव हुँदा दुर्गम जिल्लामा बिरामीहरुले विभिन्न कठिनाई तथा आर्थिक भार व्यवहोर्न बाध्य थिए । शल्यक्रिया पूनः संञ्चालनमा आएपछि प्रसूति सेवासंगै सामान्य खालका अप्रेसन सेवा जिल्लामै सम्भव हुने जनाईएको छ ।
मुस्ताङ अस्पतालले स्थापनाको ४८ वर्षपछि आकस्मिक शल्यक्रिया सेवा संञ्चालनमा ल्याएको थियो । संघीय सरकार अन्तर्गत गत आवमा (सिओएमसी) साईट स्थापना शिर्षकमा विनियोजित २५ लाख बजेटबाट शल्यक्रिया उपकरण तथा सामाग्री खरिद गरी अप्रेसन थिएटरको व्यवस्थापन गरेको थियो ।
शल्यक्रिया संम्वन्धि उपकरण तथा सामाग्री व्यवस्थापन र आवश्यक तालिम उपलब्ध गराउँदै मुस्ताङ जिल्ला अस्पतालले भदौ १ गते प्रसूतिको सफल शल्यक्रिया गराएको थियो । त्यसपछिका दिनमा शल्यक्रिया सेवा अवरुद्ध हुँदै आईरहेको थियो । मुस्ताङको थासाङ–३ लेते कालोपानीकी २४ वर्षीया महिला अनिता परियारको शल्यक्रिया मार्फत सुत्केरी गराईएको थियो ।