समाधान संवाददाता

पुण्य परोपकार धर्म जागरण संस्था पोखरा ५ मालेपाटनले मानव सेवा आश्रमलाई खाद्यान्न सामग्री सहयोग गरेको छ । चामल, दाल, तेल, नुन, बिस्कुट, जुस लगायत खाद्यान्न पोखरा १७ छोरेपाटनस्थित आश्रमका सहसंयोजक राजेन सापकोटालाई हस्तान्तरण गरेको हो । संस्थाले पहिलोपटक मानव सेवा आश्रमलाई सहयोग उपलब्ध गराएको बताउँदै जागरण संस्थाका अध्यक्ष नारायणप्रसाद अर्यालले आगामी दिनमा निरन्तर सहयोग गरिने बताए ।

संस्थाका सचिव विकास बरालले खाद्यान्न हस्तान्तरणमा गुड लाइफ बिस्कुट र जुस सम्बन्धित कम्पनीले सौजन्य उपलब्ध गराएको जानकारी दिए । अन्य सहयोग संस्थाकै पदाधिकारीहरु मिलेर जुटाएको उनले बताए । आश्रममा अशक्त, मनोरोगी, अपांगता भएका व्यक्ति, अनाथ र वृद्धवृद्धा गरी १ सय भन्दा बढी आश्रित छन् । आश्रितको पालनपोषण र लालनपालनको खर्च विभिन्न दाताबाट जुट्दै आएको छ ।