समाधान संवाददाता
पोखरा

पोखरा, १३ स्थित कमलपोखरीमा नागपञ्चमीको अवसर पारेर सोमबार वृहत पूजाआजा भएको छ । मुख्य मन्त्रीका राजनीतिक सल्लाहकार गोविन्द नेपालीले नाग पूजा गर्नुको साथै सोमबारै पोखरीमा डुंगा सञ्चालन उद्घाटन गरेका छन् ।

डब्लुडब्लु एफ र हरियो वनको सहयोगमा ४ लाख रुपैयाँ र कमलपोखरी संरक्षण समितिले ५० हजार लगानी गरेर डुंगा सञ्चालनमा आएको हो । २ जना चालकसहित १० चढ्न मिल्ने डुंगा सञ्चालनमा आएपछि कमल पोखरीमा आन्तरिक पर्यटक बढ्ने विस्वास लिइएको समिति अध्यक्ष चित्रबहादुर विकले बताए । समितिले हालका लागि १ घन्टाका लागि न्यूनतम ५० रुपैयाँ लिने व्यवस्था गरेको छ । सोमबार उद्घाटनको दिन भने भक्तजनका लागि डुंगा निशुल्क थियो ।

समितिका संस्थापक अध्यक्ष केशबहादुर विकको सभापतित्वमा भएको कार्यक्रममा कमलपोखरी आमा समूहकी अध्यक्ष हस्तीमाया विक लगायत स्थानीय चूडामणि विक, जंगबहादुर विक, तीलबहादुर विक, आमा समूह, युवा क्लबका प्रतिनिधि लगायत सहभागी थिए । कार्यक्रममा स्थानीय एवं शिक्षासेवी प्राध्यापक तारा बरालले स्वागत गर्दै कमलपोखरीको महत्वको बारेमा चर्चा गरे । रामसारमा सूचीकृत ९ तालमध्ये कमलपोखरी पनि परेको छ । कमल फूलले भरिपूर्ण भएकाले यसलाई कमलताल भनिएको हो । स्थानीयस्तरमा यसलाई बुडुवा तालको नामले चिनिन्छ ।