जोमसोम ।
मुस्ताङको घरपझोङ गाउँपालिका १ स्थित गणतान्त्रिक छैरोमा विषेशज्ञ चिकित्सकसहितको निःशुल्क स्वास्थ्य शिविर चलाईएको छ । अरनिको समाज काठमाडौंको आयोजना तथा हिमालपारी उत्पीडित समुदाय विकास तथा सशक्तीकरण परिषदको समन्वयमा आइतबार विशेषज्ञ सेवासहितको स्वास्थ्य शिविर सञ्चालन गरिएको हो ।

अरनिको समाज संस्थाबाट निःशुल्क स्वास्थ्य शिविर सञ्चालन गर्नका लागि डा. कृष्ण गोपाल महर्जनसहित १५ जनाको टोली मुस्ताङ आइपुगेको थियो । टोलीमा डा महर्जनसहित ६ जना विशेषज्ञ चिकित्सकको सहभागिता थियो । शिविरबाट ९४ जना लाभान्वित भएको घरपझोङ गाउँपालिकाका स्वास्थ्य संयोजक कर्णबहादुर थकालीले जानकारी दिए ।

शिविर संञ्चालनमा गाउँपालिकाले समेत सहयोग पुर्‍याएको स्वास्थ्य संंयोजक थकालीले बताए । दक्ष स्वास्थ्य जनशक्ति र चिकित्सकीय प्राविधिकरण उपकरण नहुँदा भरपर्दो स्वास्थ्य सेवा लिनबाट बञ्चित छैरो र चिमाङ गाउँका स्थानीय नागरिकलाई स्वास्थ्य शिविरले ठूलो सहयोग पुगेको हिमालपारि उत्पिडित समुदाय विकास तथा सशक्तीकरण परिषद मुस्ताङका अध्यक्ष भीमबहादुर रसाईलीले उल्लेख गरे ।

छैरो स्कुलमा सञ्चालित स्वास्थ्य शिविरबाट स्थानीय नागरिक र विद्यालयका स—साना बालबालिकाले निःशुल्क स्वास्थ्य लाभ लिने अवसर मिलेको छ । शिविरमा दन्त उपचार, जनरल उपचार, पाठेघर क्यान्सरको पूर्व स्क्रीनिङ, पिसाबको स्ट्रिप र ब्लड सुगर परीक्षण प्रयोगशाला र निःशुल्क औषधी वितरण लगायतका सेवा प्रवाह गरिएको थियो ।

घरदैलोमै चिकित्सकीय स्वास्थ्य सेवा पाएपछि स्थानीय नागरिक खुसी भएका छन् । सुगमको अस्पतालमा भरपर्दो स्वास्थ्य सेवा लिन जाँदा धेरै पैसा खर्च हुने, दुःख सास्ती र समय अनुकूल नहुने हुँदा समस्यामा परेका स्थानीयले शिविरको लाभ लिएका हुन् ।