समाधान संवाददाता
पोखरा

यातायात व्यवस्था कार्यालय गण्डकी (सवारी चालक अनुमतिपत्र) कार्यालयको नक्कली पेज बनाउने १ जनालाई गण्डकी प्रदेश प्रहरी कार्यालयबाट खटिएको टोलीले पक्राउ गरेको छ । पोखरा २४ कास्कीकोट घर भई हाल पोखरा महानगरपालिका १ बगरमा बस्दै आएका साजन सुवेदीलाई प्रहरीले मंगलबार पक्राउ गरेको हो ।

यातायात व्यवस्था कार्यालय गण्डकी (सवारी चालक अनुमतिपत्र)को पेजबाट उनले विभिन्न व्यक्तिसँग कुराकानी गरेको प्रहरीको अनुसन्धानमा भेटिएको छ । उनले लाइसेन्स फर्म भर्ने भनेर सार्वसाधरणसँग २ हजार देखि २ हजार ५ सय रुपैयाँसम्म लिने गरेको अनुसन्धानबाट खुलेको छ ।

सुवेदीले भरेको केही फर्मसमेत प्रहरीले नियन्त्रणमा लिएको छ । थप अनुसन्धानका लागि उनलाई थुनामा राख्न प्रहरीले बुधबार कास्की अदालतको अनुमति पाएको छ । सुवेदीको पेजबाट केही व्यक्तिलाई २ हजार रुपैयाँ लिएर फर्म भरेको प्रहरीकोमा गुनासो पुगेको थियो । सोही गुनासोको आधारमा प्रहरीले उनलाई पक्राउ गरेको हो ।