पोखरा ।
पृथ्वीसुब्बा गुरुङ नेतृत्वको गण्डकी प्रदेश सरकार ढलाउन नहुने पक्षमा लाग्दा जनमोर्चाका गण्डकी प्रदेश सभा सदस्य कृष्ण थापाले पद गुमाए । पार्टीले उनीमाथि गरेको कारबाहीपछि सभामुख नेत्रनाथ अधिकारीले थापाको सांसद पद खारेज गरे । त्यसविरुद्ध थापाले सर्वाेच्च अदालतमा परेको रिटको अन्तिम फैसला आइसकेको छैन, तर उनको निर्वाचन क्षेत्रमा उपनिर्वाचन हुनसक्ने देखिएको छ ।

निर्वाचन आयोगले जनप्रतिनिधिविहीन ठाउँमा उपनिर्वाचन मिति तोक्न सरकारलाई भनिसकेको छ । देशभर संघीय संसदका ४ र प्रदेश सभाका १८ निर्वाचन क्षेत्र जनप्रतिनिधिविहीन छन् । त्यसमध्ये एउटा बागलुङमा कृष्ण थापाको क्षेत्र पनि हो ।

निर्वाचन आयोगले आउँदा स्थानीय तह निर्वाचनअगावै प्रदेश सभा र प्रतिनिधिसभाको उपनिर्वाचन गर्न सुझाएको छ । सरकार पनि उपनिर्वाचनको मिति घोषणा गर्ने तयारी जुटेको छ ।

बागलुङ १ ‘ख’ मा २०७४ सालमा जनमोर्चाका कृष्ण थापा विजयी भएका थिए । त्यतिबेला एमाले र माओवादीले उनलाई समर्थन गरेका थिए । तर जनमोर्चाले एमाले नेता पृथ्वीसुब्बा गुरुङलाई गण्डकी प्रदेशको मुख्यमन्त्रीबाट हटाउन अविश्वासको प्रस्तावमा समर्थन गर्न भन्दा थापाले मानेका थिए । त्यसै कारण गएको जेठदेखि थापालाई पार्टीले निकाल्यो र प्रदेश सभा सदस्यको पद पनि खोस्यो ।

थापाले १४ हजार ३ सय ७२ मत ल्याएर चुनाव जित्दा उनका निकटतम् प्रतिस्पर्धी कांग्रेस उम्मेदवार प्रकाश पौडेलले ९ हजार ९४ मत पाएका थिए । ७४ को निर्वाचनमा बागलुङभर १ लाख ६७ हजार २ सय ८२ मतदाता थिए । अब उपनिर्वाचन भयो भने एमालेले कांग्रेस, माओवादी केन्द्र, नेकपा एकीकृत समाजवादी लगायतको गठबन्धनसँग जुध्न पर्ने पनि हुनसक्छ । तर सत्तारुढ पार्टीहरुले अबका निर्वाचनमा पनि गठबन्धन बनाउँछन् या बनाउँदैनन् भन्ने यकीनचाहिँ छैन ।