अटेरी व्यवसायीलाई ५० हजार जरिवाना

सञ्जय रानाभाट २०७८ फागुन २२ गते १७:१०

पोखरा
अनुगमन टोलीले दिएको निर्देशन अवज्ञा गर्दा पोखराका एक पसलले जरिवाना तिर्नुपरेको छ । उपभोक्ता हित संरक्षण निर्देशनालय गण्डकी प्रदेश सरकारको संयोजकत्वमा फागुन १४ गते गरेको अनुगमनमा पोखरा महानगरपालिका ३२ राजाकोचौतारामा रहेको युनिक ट्रेडर्सले जरिवाना तिरेको हो ।

Advertisement


निर्देशनालयको टोलीले गत असोज १४ गते चाडपर्व लक्षित अनुगमन गरेको थियो । पसलमा मूल्यसूची टाँस्न, मदिरा र किराना एकै ठाउँमा सञ्चालन नगर्न साथै सरसफाइमा ध्यान दिन निर्देशन दिएको थियो । तर ती निर्देशन अटेर गरेको हुँदा जरिवाना तिराइएको उपभोक्ता मञ्च गण्डकीका अध्यक्ष कपिलनाथ कोइरालाले बताए ।


‘यसअघि नै अनुगमन टोलीले पत्र काटेर मुचुल्का उठाएर निर्देशन दिएको थियो । सुधार गर्नुपर्ने कुराहरु मुचुल्का उठाएर १ प्रति ती व्यवसायीलाई दिएका थियौं । तर, उपभोक्ताबाट बारम्बर गुनासो आयो । निर्देशनालय र उपभोक्ताको टोलीले फेरि फागुुन १४ गतेसम्म गरेको अनुगमनमा पसलमा कुनै सुधार नदेखेपछि जरिवना तिराएका हौं,’ उनले भने ।

Advertisement


यसरी किरानाको अनुमति लिने र मदिराजन्य पदार्थ बच्ने गरेपछि पत्र नै काटेर त्यसो नगर्न निर्देशन गर्दासमेत उनले दोस्रोपटक अवज्ञा गरेको हुँदा कारबाही गरिएको कोइरालाले बताए । ‘जरिवाना तिराएर पसलमा मूल्यसूची टाँस्न, सरसफाइ गर्न र मिति गुज्रेका सामानहरु छुट्टै कोठामा राख्न निर्देशन दिएका छौं । त्यो पनि अटेरी गरे अर्को थप कारबाही गर्छाैंैं,’ कोइरालाले भने ।
निर्देशनालयका निर्देशक नारायण आचार्य संयोजकत्वको अनुगमन टोलीमा उपभोक्ताहित संरक्षणकर्ता, जिल्ला प्रशासन कार्यालय, जिल्ला प्रहरी कार्यालय, खाद्य प्रविधि तथा गुण नियन्त्रण कार्यालयका प्रतिनिधि थिए ।

सञ्जय रानाभाट

रानाभाट समाधानन्युज डटकम र समाधान दैनिकका संवाददाता हुन् ।

तपाईको प्रतिक्रिया