पोखरा ।
पोखराको न्युरोडमा अवस्थित लक्ष्मी आवासीय माध्यमिक विद्यालयको ३६ औं वार्षिकोत्सव एवं अभिभावक दिवस आइतबार भएको छ ।

कार्यक्रममा प्याब्सन कास्की अध्यक्ष मथुराप्रसाद पौडेलले निजी विद्यालयले शिक्षा क्षेत्रको विकासको लागि अतुलनीय योगदान गरेको बताए ।

उनले विद्यालयले मात्रै नभई अभिभावकले पनि विद्यार्थीहरुलाई व्यावहारिक तथा संस्कार युक्त बनाउनका लागि विशेष ध्यान दिनुपर्नेमा जोड दिए ।

पूर्व जिल्ला शिक्षा अधिकारी नगेन्द्रराज पौडेलले स्थापना कालदेखि अहिलेसम्म विद्यालयको गतिबिधि आफूले नजिकबाट नियालेको बताउँदै विद्यालयले प्रदान गरेको व्यवहारिक शिक्षाबाट आफू प्रभावित भएको बताए ।

प्राचार्य शालिकराम अधिकारीले विद्यालयको वर्तमान गतिविधका साथै आगामी कार्यक्रमका बारेमा जानाकारी गराए ।

विद्यालयकी संस्थापक निर्देशक लीलावती प्रधानको अध्यक्षतामा भएको कार्यक्रममा पूर्व शिक्षका रमा पौडेल, अभिभावकको तर्फबाट डा. निभा अमात्य, चाटर्ड एकाउन्टेन्ट अमित थापा, सहप्राचार्यनवराज अधिकारी, संस्थापक सदस्य मित्रलाल पौडेल लगायतले बोलेका थिए ।

कार्यक्रममा विद्यालयले शैक्षिक सत्र २०७७ र २०७८ को शैक्षिक तथा अतिरिक्त क्रियाकलापमा प्रथम, द्वितीय र तृतीय हुने छात्राछात्रलाई पुरस्कार तथा मेडल वितरण गरेको छ । विद्यार्थीले विभिन्न सांस्कृतिक कार्यक्रम प्रस्तुत गरेका थिए ।