पोखरा ।
पोखराको मणिपाल शिक्षण अस्पतालमा चिकित्सक कुटिएको घटनामा जिल्ला अदालत कास्कीले गरेको आदेशविरुद्ध उच्च अदालत पोखरामा निवेदन परेको छ । उच्च सरकारी वकिलको कार्यालयले चिकित्सक कुटपिट गर्ने ७ जनालाई धरौटीमा छाड्न जिल्ला अदालतले दिएको आदेशविरुद्ध उच्च अदालतमा निवेदन दिएको हो ।

जिल्ला अदालतले ७ जनालाई पुर्पक्षका लागि पठाउने पर्याप्त आधार हुँदाहुँदै धरौटीमा छाडिएको भन्दै मंसिर ७ गते उच्च अदालत पोखरामा निवेदन परेको हो । उक्त निवेदन उपर आदेश गर्दै शुक्रबार उच्चका न्यायाधीश धनसिंह महराको इजलासले जिल्ला अदालतसँग कैफियत माग गर्ने आदेश गरेको उच्चका उप–रजिस्ट्रार तथा सूचना अधिकारी विश्व अर्यालले जानकारी दिए ।

७ जना धरौटीमा छाडेको जिल्ला अदालतसँग उच्चले माग्यो कैफियत

Advertisement

‘चिकित्सकलाई हातपात गरेको विषयलाई लिएर जिल्ला अदालतमा मुद्दा पर्‍यो । उक्त मुद्दामाथि थुनछेक गर्दा २ जनालाई थुनामा पठाइयो र ७ जनालाई धरौटी छाड्न आदेश भयो । सोही आदेशविरुद्ध उच्च सरकारी वकिलको कार्यालयबाट निवेदन प¥यो । त्यो निवेदन उपर कैफियत माग गर्ने अन्तिम आदेश भएको हो,’ सूचना अधिकारी अर्यालले थपे, ‘आदेशमा किन छाडिएको हो ? कारणसहित कास्की जिल्ला अदालतसँग १५ दिनभित्र कैफियत माग गरिएको छ । प्रतिवेदन प्राप्त भएपछि त्यसपछि डिभिजन बेन्चमा जान्छ । डिभिजन बेन्चले थुनामा पठाउने वा नपठाउने अन्तिम आदेश गर्छ ।’

जिल्ला अदालतका न्यायाधीश धु्रवकुमार पियाको इजलासले असोज २६ गते चिकित्सकमाथि आक्रमण गर्ने २ जनालाई पूर्पक्षका लागि थुनामा पठाएको थियो । बाँकी ७ जनालाई धरौटीमा रिहाको आदेश भएको थियो । पियाको इजलासले विनय गुरुङ र छावा भनिने सुशील कार्कीलाई पुर्पक्षका लागि थुनामा र सञ्जय पीडित भनिने सुजित मुल्मी, अभिनाश गुरूङ, अरुण गुरुङ, नीतेश गुरुङ, विवेक गुरुङ, मनीष थापा र प्रदीप गुरुङलाई जनही १ लाख धरौटीमा छाड्न आदेश गरेको थियो । उक्त आदेश उपर उच्च अदालतमा निवेदन परेको हो ।

प्रहरी भन्छ– फरारको खोजी भइरहेको छ
अस्पतालमा उपचारका क्रममा असोज ८ गते दिउँसो १ बजे लमजुङको सुन्दरबजार नगरपालिका वडा नम्बर ५ की ५७ वर्षीय सुकमाया दुराको मृत्यु भएपछि चिकित्सक र मृतकका आफन्तबीच तनाव उत्पन्न भएको थियो । दुराको मृत्युपछि आफन्त आक्रोशित भए । उपचारमा चिकित्सकले लापरबाही गरेको आरोप लगाए । अस्पतालमा तोडफोड गरे । मृत्युको कारण खुलाउनुपर्ने माग गर्दै नाराबाजी गरे । त्यही भीडको निसानामा परे डा. अनिल शाह ।

पोखरा ८ का गौरव बराल, पोखरा २ का गिरे हिपप भनिने गिरबहादुर पुन, पोखरा १५ का प्रेमलाल पुन, पोखरा ६ का सागर परियार, पोखरा १७ का पशुपति भट्टराई, पोखरा ९ का हम्पे भनिने नवीन लामा, पोखरा ३ का सुजन अधिकारी, पोखरा १० का चुमन गुरुङ, पोखरा ११ का पागल अर्थात अशिष भनिने कार्लोस गुरुङ र पोखरा २३ का उत्तम भण्डारी अझै फरार छन् । ९ जनालाई कास्की प्रहरीले पक्रेर मुद्दा चलाएको थियो । तीमध्ये ७ जना धरौटीमा छुटे भने २ जना पुर्पक्षका लागि जेल परेका छन् ।

आक्रोशित भीडले अस्पतालमा भौतिक क्षतिसमेत पुर्‍याएको थियो । केही दिनपछि पीडितका आफन्त र चिकित्सक पक्षबीच अस्पताल प्रशासनको रोहबरमा ६ बुँदे सहमति भएको थियो । त्यसका बाबजुद कास्की प्रहरीले असोज ८ गते असोज १२ तथा अन्य मितिमा गरेर ९ जनालाई पक्राउ गरेको थियो । मणिपाल प्रकरणमा १९ जना दोषी देखिएपछि कास्की प्रहरीले जिल्ला अदालतबाट १९ जना विरुद्ध पक्राउ पुर्जी जारी गरेको थियो ।

हालसम्म ९ जनामात्र पक्राउ गरी जिल्ला अदालतमा पेश गरेको थियो । अन्य १० जना भने अझै फरार रहेको कास्की प्रहरी नायब उपरीक्षक तथा सूचना अधिकारी श्रवणकुमार विकले जानकारी दिए । ‘उक्त प्रकरणमा जोडिएकामध्ये ९ जनालाई प्रहरीले नियन्त्रणमा लिएर अदालत बुझाएको छ । अन्य १० जनाको खोजी भइरहेको छ,’ डिएसपी विकले भने ।