पोखरा ।
लामा अमृत फाउन्डेसन घान्द्रुकका संस्थापक अमृत गुरुङले आफ्नो जन्मोत्सव वृद्धाश्रम, मानवसेवा आश्रम छोरेपाटन र मृगौला पीडितलाई सहयोग गरेर मनाएका छन् । गुरुङले पोखरा १७ छोरेपाटनस्थित मानवसेवा आश्रम र सीतापाइलास्थितको वृद्धाश्रम र मृगौला पीडित नरबहादुर तामाङलाई खाद्यान्न सहयोग गरेका छन् ।

गुरुङले आफ्नो जन्मोत्सवमा आशीर्वाद लिन वृद्धाश्रम, मानवसेवा आश्रम पुगेको बाताए । ‘आजभोलि जन्मदिनमा फजुल खर्च गर्ने प्रचलन बढ्दो छ । साथीभाइसँग भेटघाटमा रमाइलो हुन्छ’, गुुरुङले भने, ‘जन्मदिनमा बाहिर गर्ने फजुल खर्चभन्दा कुनै सामाजिक सेवामा खर्च गर्न पाए शान्ति मिल्छ ।’

उनले युवा पुस्तालाई सन्देश दिने उद्देश्यले जन्मोत्सव आश्रममा मनाएको बताए । ‘यो मेरो सहयोग भन्दा पनि सन्देश हो,’ उनले भने ,‘भोज गरेर खर्च गर्नुको सट्टा असहायको साहरा बन्न सक्नुपर्छ भन्ने हेतुले हरेक वर्ष मैले यसरी नै जन्मोत्सव मनाउने गर्दछु ।’
युवा व्यवसायी तथा समाजसेवी गुरुङले सामाजिक सेवासँगै खेलकुद विकासको क्षेत्रमासमेत काम गर्दै आएका छन् । मानवसेवा आश्रम छोरपाटनमा ६७ जना र सीतापाइलास्थित पोखरा वृद्धाश्रममा ५७ जना आश्रित छन् ।