पद्धतिमा चले दुर्घटना कम हुन्छः मुख्यमन्त्री

समाधान संवाददाता २०८१ वैशाख २६ गते १०:०१

पोखरा ।
गण्डकी प्रदेशका मुख्यमन्त्री खगराज अधिकारीले ट्राफिक नियम पालना गर्नका लागि सबैलाई आग्रह गरेका छन् । मंगलबार गण्डकी प्रदेशका ११ वटै जिल्लामा एकसाथ आयोजित ट्राफिक सप्ताह कार्यक्रम पोखरामा सुरुआत गर्दै उनले एउटा सामान्य नियम पालना गर्न सके सबैको जीवन सुरक्षित हुने भन्दै यस्तो आग्रह गरेका हुन् ।


‘एउटा सामान्य नियम पालना गर्दा हामी सबैको जीवन सुरक्षित हुन सक्छ, सामान्य छ कुरा यसलाई अत्यन्त विशिष्ट र जटिल बनाएर नियम क्रस गर्न खोजियो भने हाम्रो जीवन चक्र पनि चल्दैन,’ उनी भन्छन् । शरीरमा रोग लाग्न नदिनका लागि आहार विहारमा ध्यान दिए जस्तैगरी ट्राफिक नियमहरू पालना गर्न झन्झट नमानी सरल रुपमा लिनुपर्नेमा उनको जोड छ ।


दुर्घटनाको मुख्य कारण मानवीय लापरवाही हुने तथ्यांकले देखाएको भन्दै यसलाई घटाउन सबै जना सचेत बन्नुपर्ने मुख्यमन्त्री अधिकारीले औंल्याए । कार्यक्रममा ७७ दशमलव २७ प्रतिशत दुर्घटना सवारीचालकको लापरवाहीका कारण हुने गरेको तथ्यांक सार्वजनिक गरिएको थियो । यात्रुका कारण ८ दशमलव ८२ प्रतिशत, यात्रीका कारण ६ दशमलव ६८ प्रतिशत र सडकका कारण ६ दशमलव ९५ प्रतिशत दुर्घटना भएका छन् ।

Advertisement


‘यहाँ दिएको डाटा अनुसार दुर्घटनाका प्रतिशतमा मानवीय लापरवाही नै प्रधान देखियो, नियम उल्लङ्घन कुराले धेरै क्षति भइरहेको हुन्छ, नियम र पद्धतिमा चल्यौँ भने कहिल्यै समस्या हुँदैन,’ मुख्यमन्त्री अधिकारीले थपे । विद्यालयमा अध्ययनरत विद्यार्थीले जागरणको रुपमा लिएर सचेतना प्रदान गर्न भूमिका खेल्न सकेको खण्डमा सभ्य समाज निर्माणमा सहजता हुने उनको ठम्याइ छ ।


आफ्नो अघिल्लो कार्यकालमा विपद्, ट्राफिक नियम उल्लङ्घन, किशोरीको आत्मरक्षा लगायतको सम्बन्धमा कक्षा ८ र ९ का विद्यार्थीलाई जानकारी दिन पाठ्यक्रम बनाउन सुरु गरेको भन्दै त्यसलाई अब पूर्णता दिएर कार्यान्वयनमा ल्याउने प्रतिवद्धतासमेत मुख्यमन्त्री अधिकारीले जनाए । जागरणका कार्यक्रमले सभ्य समाज निर्माणमा सहयोग गर्ने उनले वाचा गरे ।

Advertisement


‘विद्यालयका भाइबहिनीले जागरणको रुपमा लिएको खण्डमा सभ्य समाज निर्माण त्यहींबाट सुरु हुन्छ, असभ्य समाजमा दुर्घटना बढी हुन्छ, नियमहरु तोडिन्छ, हामी असभ्य हुन चाहदैनौं,’ उनले भने ।


ट्राफिकका सबै नियम पालना गर्दै उत्कृष्ट प्रदेश बनाउने प्रहरीको अभियानमा आफ्नो सदैव साथ रहने जनाए । गण्डकी प्रदेशमा यो आर्थिक वर्षमा ३ सय २२ वटा सवारी दुर्घटना हुँदा १ सय ५५ जनाले ज्यान गुमाएको ट्राफिक प्रहरीको तथ्यांक छ । ट्राफिक सप्ताह वैशाख ३१ गतेसम्म चल्नेछ । कार्यक्रमअभि पोखराको चिप्लेढुंगाबाट सभागृहसम्म मुख्यमन्त्री अधिकारीसमेतको सहभागितामा प्रभातफेरी निकालिएको थियो ।

तपाईको प्रतिक्रिया