पोखरा । नेपाल खेलकुद पत्रकार मञ्च, गण्डकीका नवनिर्वाचित कार्यसमितिको शनिबार पोखरामा पदस्थापन गरिएको छ । मञ्चको तेस्रो अधिवेशनबाट निर्वाचित एमबी आस्थामगर नेतृत्वको टिमलाई सञ्चार तथा सूचना प्रविधि मन्त्री पृथ्वीसुब्बा गुरुङको उपस्थितिमा पदस्थापन गरिएको हो ।
निर्वाचन समितिका संयोजक केशव बरालले नवनिर्वाचित टिमलाई पद तथा गोपनियताको सपथ गराएका थिए । सञ्चारमन्त्री गुरुङले निर्वाचितलाई प्रमाणपत्र प्रदान गरेका थिए । कार्यक्रममा सञ्चार मन्त्री गुरुङले सञ्चार क्षेत्र व्यवस्थित हुनुपर्ने बताए । यो क्षेत्र आफैंमा अनुशासित हुन नसकेको उनको भनाइ छ ।
‘प्रिन्ट र ब्रोडकास्टिङमा त्यति ठूलो समस्या छैन् तर अनलाइन मिडियामा यस्तो ठूलो समस्या छ । हाम्रो सभ्यता, मर्यादा नाघेर स्वाधीनता, स्वतन्त्रताको विरुद्धमा लेखिदिन्छ,’ उनले भने, ‘यसले गर्दा सामाजिक, धार्मिक दुर्भावना फैलाइराखेको हुन्छ । यस्तो मिलेर बसेको समाजलाई अस्तव्यस्त पारिरहेको छ ।’
अनलाइन मिडिया नियमन गर्नका लागि सामाजिक सञ्जाल प्रयोग, सञ्चालन र नियमन विधेयक पास गरिसकिएको उनले बताए । उक्त कार्यक्रममा निवर्तमान अध्यक्ष दीनानाथ बराल, निर्वाचित अध्यक्ष एमबी आस्थामगर, अध्यक्षका प्रत्यासी सुरज श्रेष्ठ लगायतले हरेक खेल क्षेत्रको विकासका लागि पत्रकारिताका माध्यमबाट खबरदारी र प्रचारप्रसारमा ध्यान दिनुपर्ने बताए ।
बिहीबार भएको नेपाल खेलकुद पत्रकार मञ्चको अधिवेशनबाट अध्यक्षमा पत्रकार एमबी आस्थामगर निर्वाचित भएका हुन् । प्रतिस्पर्धी सुरज श्रेष्ठलाई पराजित गर्दै एमबी अध्यक्ष निर्वाचित भएका हुन् । एमबीले ३६ मत पाउँदा सुरजको २७ मत आएको थियो ।
उपाध्यक्षमा उमा आलेमगर ३६ मतसहित विजयी भएकी थिइन् । उनकी प्रतिस्पर्धी राधिका कँडेलले २७ मत ल्याइन् । पर्शुराम शर्मा महासचिव निर्वाचित भएका थिए । उनले ३८ मत ल्याउँदा सोही पदकी प्रतिस्पर्धी लक्ष्मी जिसीले २५ मत पाइन् ।
सचिवमा राजु गिरी ४१ मतसहित विजयी हुँदा उनका प्रतिस्पर्धी कविता घर्तीमगरले २३ मत पाएकी थिइन् । उपाध्यक्षमा राजाराम पौडेल र कोषाध्यक्षमा भने विमल तिवारी निर्विरोध भएका थिए । सदस्यमा गीता राना, कृष्ण दवाडी, चेतबहादुर (प्रवीण) थापा, बसबहादुर (वसन्त) शेर्पा, रिखिराम जिसी, विजय नेपाली र बालकुमारी पौडेल निर्विरोध भएका थिए ।