पोखरा । लिटिल स्टेप माध्यमिक विद्यालयको ४२औँ वार्षिकोत्सवको सन्दर्भमा बालबालिका लक्षित १२ औं लिटिल स्टेप यू १२ (अप टु ग्रेड ५) छात्र छात्रा ह्याण्डबल प्रतियोगिता २०८१ आयोजना गरिएको छ ।

पोखरा लिङ्कन इन्टरनेशनल कलेजको संयोजनमा दुई दिनसम्म भएको अन्तर विद्यालय स्तरीय प्रतियोगितामा छात्रतर्फ २१ र छात्रातर्फ १३ गरी ३४ स्कुलले भाग लिएका छन् । प्रतियोगितामा छात्रतर्फ अल्फा बोर्डिङ स्कुल र छात्रातर्फ हिमालयन बोर्डिङ स्कुल प्रथम भए । विजेता टिमलाई ८ हजार नगद सहित ट्रफी, मेडल र प्रमाणपत्र प्रदान गरिएकोे छ । प्रतियोगितामा छात्र तथा छात्रा दुवैतर्फ द्वितीय स्थान हासिल गर्ने लिटिल स्टेप माध्यमिक विद्यालयको टिमलाई ७ हजार नगद सहित सहित ट्रफी, मेडल र प्रमाणपत्र प्रदान गरियो । त्यस्तै सेमी फाइनलमा उपविजेता टिमलाई तृतीय मानेर छात्रतर्फ माउण्ट अन्नपूर्ण र पोखरा एकेडेमी र छात्रातर्फ गण्डकी बोर्डिङ स्कुल र माउण्ट अन्नपूर्णलाई ६ हजार नगद सहित ट्रफी, मेडल र प्रमाणपत्र गरेको विद्यालयका संस्थापक अध्यक्ष शेरबहादुर गुरुङले जानकारी दिए ।

प्रतियोगिताको सर्वाधिक गोलकर्ता छात्रतर्फ अल्फा बोर्डिङ स्कुलका विश्वास केसी र छात्रातर्फ लिटिल स्टेप माध्यमिक विद्यालयकी एलिना गुरुङलाई १ हजार नगद सहित पुरस्कृत गरिएको छ । फेयर प्लेमा छात्रतर्फ विन्देश्वरी आदर्श बोर्डिङ स्कुल र छात्रातर्फ सिर्जना माविलाई १÷१ हजार नगद सहित पुरस्कृत गरियो । उत्कृष्ट खेलाडी पुरस्कार छात्रतर्फ अल्फा बोर्डिङका विपिन छन्त्याल र छात्रातर्फ हिमालय बोर्डिङ स्कुलकी सुनसुभ थापामगरलाई जनही १/१ नगद सहित पुरस्कृत गरिएको छ । उत्कृष्ट गोल रक्षक पुरस्कार छात्रतर्फ लिटिल स्टेपका देवबहादुर मगर र छात्रातर्फ हिमालय बोर्डिङ स्कुलकी वर्षा सुनारलाई जनही १/१ नगद पुरस्कार प्रदान गरिएको छ । सो प्रतियोगितामा अफिसियल टिमलाई मायाको चिनो समेत प्रदान गरिएको थियो ।

कार्यक्रमका प्रमुख अतिथि शसस्त्र प्रहरी बलका पूर्व अतिरिक्त महानिरीक्षक दुर्जकुमार राईले बालबालिकालाई लक्षित गरी प्रतियोगिता गरेकोमा विद्यालय प्रति आभार प्रकट गरे । विद्यालयका संस्थापक अध्यक्ष शेरबहादुर गुरुङले १२ औं संस्करणसम्मका प्रतियोगिता सफल बनाउन प्रत्यक्ष परोक्ष सहयोग गर्न ह्याण्डबल पदाधिकारी, प्रायोजक, शुभचिन्तक, सुरक्षाकर्मी, शिक्षक, अभिभावक, विद्यार्थी लगायत सबैलाई धन्यवाद दिए । उनले प्रतियोगितालाई आगामी दिनमा समेत निरन्तरता दिने प्रतिबद्धता व्यक्त गरे । विद्यालयका संस्थापक प्राचार्य पम्फा गुरुङले स्वागत मन्तव्य राखेको कार्यक्रमको सञ्चालन विद्यालयका गणित विभागका प्रमुख चित्रबहादुर अधिकारीले गरेका थिए ।