पोखरा ।
सफल पोखरा अन्तर्राष्ट्रिय म्याराथनको १९ औं सँस्करणको उपाधि केन्याली धावक विल्सन चेरुईयोटले जितेका छन् । उनले ४२.२९५ किलोमिटरको दुरी २ घण्टा १७ मिनेट २१ सेकेण्डमा पूरा गर्दै पाँच लाख नगद राशीसहितको पुरस्कार प्राप्त गरे ।
२ सेकेन्डले पछि परेका केन्या कै धावक दोस्रो स्थानमा केन्याली धावक जुलियस मुरियुकीले २ घण्टा १७ मिनेट २३ सेकेण्डमा दौड पूरा गरे । जुलियसले नगद ३ लाख रुपैयाँ प्राप्त गरे । तेस्रो स्थानमा पनि केन्या कै ओनेसमस गिटायु आए । उनले उक्त दुरी २ घण्टा १८ मिनेट ४८ सेकेण्डमा पूरा गर्दै नगद २ लाख रुपैयाँ प्राप्त गरे । नेपालका किरणसिंह बोगटीलेले २ घण्टा ३८ मिनेट १७ सकेण्ड पूरा गर्दै सान्त्वना पुरस्कार प्राप्त गरे । उनले ३० हजार रुपैयाँ पुरस्कार पाए ।
आयोजक नेपाल भूतपूर्व खेलाडी मञ्चले यो वर्षदेखि उक्त विधामा गण्डकी प्रदेशका धावकका लागि छुट्टै पुरस्कारको व्यवस्था गरेको थियो । म्याराथनमा निरोज भट्ट क्षेत्री गण्डकी प्रदेशमा पहिलो, रिखुलाल सिंजालीमगर प्रदेश दोस्रो र दिनेश सिंह बोगटी तृतिय बने । उनीहरु क्रममा पोखरा म्याराथनमा पाचौं, छैटौं र सातौं स्थानमा आएका थिए ।
हाफ म्याराथन पुरुषतर्फ सन्तोषविक्रम बिष्टले पहिलो बने । उनले निर्धारित २१.०९७ किलोमिटरको दुरी १ घण्टा ९ मिनेट ७ सकेण्डमा पुरा गरे । गजेन्द्र राई दोस्रो र इमानियोल किप्टारबेई तेस्रो भए । यही बिधामा महिलातर्फ सन्तोषी श्रेष्ठले निर्धारित दुरी १ घण्टा २० मिनेट ३ सकेण्डमा पुरा गर्दै प्रथम बनीन् । स्यारोन जनोटिक दोस्रो र पुष्पा भण्डारी तेस्रो भएकी थिइन् ।
पोखरा रंगशालाबाट बिहान सुरु भएको म्याराथनको उपप्रधान एवं अर्थमन्त्री विष्णु प्रसाद पौडेलले शुभारम्भ गरेका थिए । दर्ता भएका ३ हजार भन्दा बढि र रन फर फनमा गरी १० हजार भन्दा बढिले दौडमा सहभागिता जनाएका थिए ।
रंगशालाबाट सुरु भएको दौड पोखरा महानगरका विभिन्न भाग परिक्रमा गरी पोखरा ६ लेकसाइडस्थित हल्लनचोकमा पुगेर पुरस्कार वितरण गरी समापन गरिएको थियो ।