कास्की । काठमाडौंका रोमन महर्जन पोखरामा सम्पन्न सर्वाधिक पुरस्कार राशीको आर्म रेष्लिङ प्रतियोगितामा च्याम्पियन बनेका छन् । ओभरअल उपाधि जित्दै उनले १ लाख रुपैयाँ नगद हात पारे । महर्जनले ८० केजी तौल समूहमा समेत प्रथम स्थान हासिल गरी थप ५० हजार रुपैयाँ जित्न सफल भए ।

कास्की जिल्ला आर्म रेष्लिङ संघको आयोजनामा भएको प्रतियोगिताको ६० केजी मुनिको तौल समूहमा भक्तपुरका सुमन नापित प्रथम, काठमाडौंका सिदार्थ श्रेष्ठ दोस्रो र काठमाडौंकै सुदिप तामाङ तेस्रो भए । उनीहरुले क्रमशः ५० हजार, २५ हजार र १० हजार रुपैयाँ प्राप्त गरे ।

७० केजी मुनि तौल वर्गमा तरुण विक विजेता बने भने धरानका ग्रेसविन प्रधान दोस्रो र काठमाडौंका एड्रिम राई तेस्रो भए । ८० केजी मुनिको प्रतिस्पर्धामा काठमाडौंका रोमन महर्जन प्रथम, काठमाडौंकै समिक प्रधान दोस्रो र बुटवलका आर्यन विक तेस्रो स्थानमा रहे ।

त्यस्तै, ८० केजी माथिको तौल समूहमा झापाका सौरभ प्रधान विजेता बने । विराटनगरका राहुल यादव दोस्रो र झापाकै दिपेश मैनाली तेस्रो स्थानमा परे ।

संघको आयोजनामा पहिलो पटक भएको यो प्रतियोगितामा देशभरका करिब २ सय आर्म रेष्लरले विभिन्न तौल समूहमा प्रतिस्पर्धा गरेका थिए । पन्जा लडाइँ भनेर परिचित यो खेल हाल व्यवसायिक हुँदै गएको र विदेशमा निकै लोकप्रिय रहेको संघले जनाएको छ । नेपालमा पनि युवापुस्ताको रुचि बढ्दो क्रममा रहेकाले पोखरामा पहिलो पटक ठूलो तयारीसहित प्रतियोगिता गरिएको हो ।

संघका अध्यक्ष नविन गुरुङले भने, ‘सर्वाधिक पुरस्कार राशीको यो प्रतियोगिताले युवाहरुलाई नयाँ खेलप्रति उत्साहित र सचेत बनाएको छ ।’ प्रत्येक तौल समूहमा प्रथम हुनेलाई ५० हजार, दोस्रो हुनेलाई २५ हजार र तेस्रो हुनेलाई १० हजार रुपैयाँ प्रदान गरिएको थियो ।

उनका अनुसार प्रतियोगितामा खेलाडीले एक पटक हारेपछि अर्को अवसर पाउने तर दोस्रो पटक हार्दा बाहिरिने नियम लागू गरिएको थियो । एक पटक हारेर पनि दोस्रो अवसरमा जित्ने खेलाडी फाइनलसम्म पुग्न सक्ने व्यवस्था थियो । तर त्यस्तो खेलाडीले उपाधि जित्न फाइनलमा प्रतिद्वन्द्वीलाई दुई पटक पराजित गर्नुपर्ने नियम थियो ।

प्रतियोगिताको उद्घाटन गण्डकी प्रदेशका सामाजिक विकास, युवा तथा खेलकुद मन्त्री विन्दुकुमार थापाले गरेका थिए भने पुरस्कार वितरण गण्डकी प्रदेश खेलकुद परिषदका सदस्य एवं संघका सल्लाहकार भेनिस थापाले गरेका थिए ।