पोखरा । मोफसलको चर्चित फुटबल प्रतियोगिता आहा रारा गोल्डकप मंगलबारदेखि पोखरा रंगशालामा सुरु भएको छ । २४ औं संस्करणको प्रतियोगिताको उद्घाटन खेलमा आयोजक साहारालाई क्लबलाई १–० गोल अन्तरले हराउँदै नेपाल पुलिस क्लब क्वार्टर फाइनल प्रवेश गरेको छ ।

पुलिसका खेलाडी उज्ज्वल राईले ३७ औं मिनेटमा कर्नरबाट गरेको उत्कृष्ट गोल निर्णायक बन्यो । उज्ज्वलले सेकेन्ड बार च्याप्दै गरेको कर्नर प्रहार सिधै गोलमा परिणत भएपछि सहारा प्रतियोगिताबाट बाहिरिएको हो । सुरुवाती समयबाट आक्रामक बनेको सहारा गोल व्यहोरपछि लयमा फर्कन सकेन ।

पहिलो हाफको ५ औं मिनेटमा सहाराका आर्नोल्डको पासलाई विलियम सेसेगननले सिक्स यार्ड बक्सबाट हानेको बललाई पुलिसका गोलकिपरले उत्कृष्ट बचाउ गरेका थिए । १२ औं मिनेटमा सहाराका कप्तान सुशील लामाको प्रहार पनि विफल भयो । २१ औँ मिनेटमा पुलिस क्लबका विवेकको फ्रि किक प्रहार सहाराका गोलरक्षक सन्तोष महतले बचाए ।

१७ औं मिनेटमा नेपाल पुलिसले त्यस्तै अवसर खेर फाल्यो । सुजन मगरले उनलाई उत्कृष्ट पासमा विवेक पाण्डेले नजिकैबाट प्रहार गरेको बल आकासियो । २४ औं मिनेटमा सहाराले अर्को अवसर गुमायो । सेसेगननको पासलाई सन्तबहादुर गुरुङको पावरसट क्रसबारमाथि बाट बाहिरियो ।

अब पुलिसले क्वार्टर फाइनलमा ब्रिगेड ब्वाईज क्लब युकेसँग खेल्नेछ । आज एपिएफ र मच्छिन्द्र फुटबल क्लबबिच खेल हुँदै छ

Advertisement

खेलको ३७ औं मिनेटमा नेपाल पुलिस क्लबले प्राप्त गरेका कर्नरलाई उज्ज्वल राईले सेकेन्ड बारबाट जाली चुमाए । दोस्रो हाफमा बराबरी गोलको खोजीमा रहेको सहाराले गतिलो प्रदर्शन गर्न सकेन । खेलको ५६ मिनेटमा सहाराका कप्तान सुशील लामाको प्रहार पुलिसका गोलरक्षकले पन्च गर्दै रोके ।

खेलमा एकमात्र गोल गरेका पुलिसका खेलाडी उज्ज्वल राई म्यान अफ दि म्याच घोषित भए । पुलिसले क्वार्टर फाइनलमा २६ गते ब्रिगेड ब्वाईज क्लब युकेसँग खेल्नेछ । बुधबारको खेल सशस्त्र प्रहरी बलको एपिएफ र मच्छिन्द्र फुटबल क्लबबिच हुनेछ ।
यसअघि प्रतियोगिताको उद्घाटन पोखरा महानगरपालिका मेयर धनराज आचार्यले गरेका थिए । पोखराको ब्रान्डमा रुपमा स्थापित प्रतियोगितालाई पोखरा महानगर सदैव तयार रहेको उनले बताए । पोखरा पर्यटनको राजधानी भइसकेको अवस्थामा यी, यस्ता इभेन्टले पर्यटन प्रवद्र्धनमा टेवा पुग्ने उनको भनाइ छ । आगामी वर्षदेखि पोखरासँग भगिनी सम्बन्ध भएका सहरबाट टिम ल्याउन पहल गर्ने उनले उल्लेख गरे ।

फागनु ३ गतेसम्म सञ्चालन हुने प्रतियोगिताका विजेताले १२ लाख १ हजार र उपविजेताले ६ लाख १ हजार रुपैयाँ पुरस्कार प्राप्त गर्ने छन् । उत्कृष्ट पाँच विधाको पुरस्कारलाई सूर्यबहादुर केसी स्मृतिले प्रायोजन गरेको छ ।

म्यान अफ दि म्याच ट्रफी, नगद र पदकलाई सहारा युकेले सौजन्य गरेको छ । प्रत्येक भाग्यशाली दर्शकलाई प्रत्येक दिन ५ हजार रुपैयाँबाट पुरस्कृत गरिनेछ । जसलाई सहारा एफसी युकेका संस्थापक सिईओ हरिकुमार श्रेष्ठले गरेका छन् । हरेक खेलका फ्यान अफ दि म्याचलाई सहारा युकेले २ हजार ५ सय रुपैयाँ प्रदान गर्ने क्लबले जनाएको छ । प्रतियोगिताको उपप्रायोजक पोखरा महानगरपालिका वडा नं ९ र सह उपप्रायोजकमा चरक मेमोरियल हस्पिटल छन् ।

सहारा क्लबको आयोजना, हिमश्री फुड्सको मुख्य प्रायोजन, जयश्री फुड्सको सहप्रायोजन रहेको प्रतियोगितामा ३ विभागीय क्लब आर्मी, सशस्त्र र नेपाल पुलिस क्लबसहित मछिन्द्र क्लब,अपी पावर चर्च ब्वाईज युनाईटेड क्लब, विदेशी क्लब थन्डर नर्थ युनाईटेड क्लब सिक्किम, ब्रिगेड ब्वाईज क्लब युके, थ्रीस्टार, एनआरटी, संकटाले उपाधिको लागि प्रतिस्पर्धा गर्ने छन् ।

वर्ष उत्कृष्ट खेलाडीबाट सनिश सम्मानित
सहारा क्लब पोखराले यस वर्षको उत्कृष्ट राष्ट्रिय फुटबल खेलाडी सम्मानबाट सनिश श्रेष्ठलाई सम्मान गरेको छ । आहा रारा गोल्डकप फुटबल प्रतियोगिताको उद्घाटन समारोहमा सहारा क्लब पोखराले यो वर्ष श्रेष्ठलाई सम्मान गरेको हो ।

उनलाई पोखरा महानगरपालिकाका प्रमुख धनराज आचार्यले नगद ५० हजार ५ सय ५५ रुपैयाँसहित सम्मान गरेका हुन् । प्रतिभा छनोट समितिको बैठकले श्रेष्ठलाई यो वर्ष सनिसलाई सम्मान गर्ने निर्णय गरेको थियो ।

उक्त पुरस्कार वापतको रकम क्लबका मानार्थ सदस्य खेमबहादुर गुरुङले प्रदान गर्दै आएका छन् । तनहुँको पुर्कोटका सनिश विगत ७ वर्षदेखि फुटबलमा आवद्ध छन् । नेपाली फुटबल क्षेत्रमा उत्कृष्ट योगदान दिएवापत क्लबले बर्सेनि १ जना राष्ट्रिय स्तरका फुटबल खेलाडीलाई पुरस्कृत गर्दै आएको छ ।

यसअघि भरत खवास, किरण चेम्जोङ, सुजल श्रेष्ठ, अभिषेक रिजाल, अञ्जन विष्ट, अनन्त तामाङ र आयुष घलान सम्मानित भइसकेका छन् ।