पोखरा । पोखरामा जारी चौथो सस्करणको अन्तरविद्यालय वडाध्यक्ष कप फुटबल प्रतियोगिता २०८१ अन्र्तगत शनिबार उपाधिका लागि फाइनल खेलमा हिमालयन बोर्डिङ स्कुल र एलपी देवकोटा मेमोरियल स्कुलबिच प्रतिस्पर्धा हुने भएको छ ।
आज (शुक्रबार) भएको सेमिफाइनलमा जित हासिल गर्दै दुबै विद्यालयले उपाधिको लागि फाइनलमा यात्रा तय गरेका हुन् । पोखराको ड्याम साइड क्लवको आयोजनामा गण्डकी प्रदेश प्रहरी गण (ड्यामसाइड) को खेल मैदानमा शनिबार फाइनल खेल मध्यान्हः १२ः०० बजेपछि हुने तयारी गरिएको क्लबका अध्यक्ष रमेशप्रसाद बरालले बताए ।

शुक्रबार भएको सेमिफाइनल खेलमा एलपी देवकोटा मेमोरियल स्कुलले जानकी माविलाई १—० को गोल अन्तरले पराजित गर्दै फाइनलमा यात्रा पक्का गरेको हो । एलपी देवकोटाको जितमा साजिन क्षेत्रीले एक निर्णायक गोल गरे । खेलमा एलपी देवकोटाकै प्रिन्स गुरुङ म्यान अफ दी म्याच घोषित भए ।

अर्को खेलमा हिमालयन बोर्डिङ स्कुलले ढुंगेसाँघु बोर्डिङ स्कुललाई एकतर्फी ५—० को गोल अन्तरले पराजित गर्दै उपाधि नजिक पुगेको हो । हिमालयनको जितमा म्यान अफ दी म्याच घोषित संगम गुरुङ ह्याट्रिक गर्न सफल भए । ऋतेष आले र रिजन गुरुङले एक÷एक गोलको योगदान दिए ।

होटल संघ पोखरा नेपालका अध्यक्ष लक्ष्मण सुवेदी, पोखरा १७ का वडा सदस्य एवं खेल संयोजक विक्रम गुरुङले खेलाडीलाई म्यान अफ दी म्याचको ट्रफी हस्तान्तरण गरेका थिए । तेस्रो स्थानको लागि शनिबार ८ः३० बजे जानकी मावि र ढुंगेसाँघु बोर्डिङ स्कुलबिच खेल हुने भएको छ ।

त्यसपछि लगत्तै पोखरा १७ का जनप्रतिनिधिहरुसहितको टोलीसँग क्लबका सदस्यहरुबिच मैत्रीपूर्ण फुटबल खेल हुने भएको प्रतियोगिताका संयोजक विनोद परियारले बताए । पोखरा महानगरपालिका वडा नम्बर १७ को प्रवद्र्धनमा सञ्चालन भएकोे प्रतियोगिता शनिबार समापन हुने भएको हो ।

प्रतियोगिताको विजेता टिमले ३० हजार, उपविजेताले २० हजार, तेस्रो हुनेले १० हजार र सान्त्वना हुने टिमले भने ५ हजारको साथमा ट्रफी, मेडल र प्रमाण—पत्र प्राप्त गर्ने छन् ।