पोखरा ।

नृत्य संग्रामको उपाधि सिनियरतर्फ सृष्टि गुरुङ र जुनियरतर्फ सिद्धार्थ विकले जितेका छन्। बिटुडी डान्स स्कुलको आयोजनामा शनिबार पोखरा उद्योग वाणिज्य संघको हलमा भएको ग्राण्ड फिनालेमा उनीहरू विजेता घोषित भएका हुन्।

सिनियरतर्फ सपुन सर्मल द्वितीय, निकिसा चौधरी तृतीय, अस्मिन पोखरेल चौथो र जेनी सेन्चुरी पाँचौँ भए। उपाधि विजेता गुरुङले नगद ७० हजार, द्वितीयले ३० हजार र तृतीयले २० हजार रुपैयाँ पुरस्कार प्राप्त गरे।

यस्तै, जुनियरतर्फ दिप्सीका गुरुङ द्वितीय, आस्रिया केसी तृतीय, प्रिन्सेस गुरुङ चौथो र संस्कृति पाण्डेले पाँचौँ स्थान हासिल गरे। विजेता विकले नगद ५० हजार, द्वितीयले ३० हजार र तृतीयले २० हजार रुपैयाँ पुरस्कार पाए। कार्यक्रममा अमृत सुनारले ‘बेस्ट कोरियोग्राफर’को अवार्ड जिते।

प्रतियोगिताको निर्णायकमा भारतीय चर्चित डान्स रियालिटी शो ‘इन्डियाज बेस्ट डान्सर सिजन–३’ का विजेता समर्पण लामा, ‘हिप हप इन्डिया’ का डान्सर नोर्बु तामाङ र बिटुडी ड्रेस सेन्टरकी सञ्चालक स्मृति गुरुङ तामाङ रहेका थिए।

आयोजकका अनुसार प्रतियोगिताको प्रि–अडिसन राउन्डमा एक हजारभन्दा बढीले सहभागिता जनाएका थिए। विभिन्न चरण पार गर्दै ग्राण्ड फिनालेमा सिनियरतर्फ १२ र जुनियरतर्फ २० जनाले उपाधिका लागि अन्तिम प्रतिस्पर्धा गरेका थिए।