पोखरा । कवि अल्पज्ञानीको कवितासंग्रह ‘उज्यालो पर्खिरहेको मानिस’ शनिबार पोखरामा गृह विमोचन गरिएको छ । पुछारसिटे अभियानको संयोजनमा भएको कार्यक्रममा अग्रज साहित्यकार सरुभक्तले पुस्तक विमोचन गरे । साहित्यकार सरुभक्तले काव्य सिर्जनाका लागि निरन्तरको साधना आवश्यक रहेको बताए । उनले भने, ‘कति धेरै कृति प्रकाशन भए भन्नुभन्दा पनि कति गुणस्तरीय प्रकाशन भए भन्ने विषय प्रधान हो ।’ कवि अल्पज्ञानीले गुणबत्ता कविता संग्रह ल्याएको भन्दै उनले प्रशंसा गरे ।

कार्यक्रममा कवि तथा कलाकार रमेश श्रेष्ठले सरल भाषा र बुझिने शैलीमा अल्पज्ञानीले चोटिला कविता सिर्जना गरेको बताए । साहित्यकार सरस्वती प्रतीक्षाले अल्पज्ञानीले कविता संग्रह अहिले प्रकाशनमा ल्याए पनि २ दसकअघि नै उनका चोटिला कविताको रसश्वादन लिन पाएको स्मरण गरिन् । पोखरेली युवा सांस्कृतिक परिवारका अध्यक्ष रीता अधिकारी ‘रितु’ ले धेरै पहिलादेखिका कविता संकलन गरी अब्बल कोटीको संग्रह प्रकाशन गरेकामा बधाई दिइन् ।

उक्त अवसरमा डा. भूमिराज बस्ताकोटी र राजिन पनेरुले अल्पज्ञानीको संग्रहमाथि विश्लेषणात्मक टिप्पणी गरेका थिए । डा. बस्ताकोटीले फाट्टफुट्ट कमजोरीबाहेक अब्बल दर्जाका कविताको संग्रह ल्याएर नेपाली साहित्यमा इटा थपेको बताए । डा. बस्ताकोटी र पनेरुले अल्पज्ञानीको कवितामा ग्रामीण जीवन, आफूले अनुभूत गरेको समय र समाजप्रतिको प्रष्ट दृष्टिकोण झल्केको भनाइ राखे ।

कार्यक्रममा ईश्वमणि अधिकारी र मदन घिमिरेले कविता वाचन गरेका थिए । कार्यक्रमको अध्यक्षता गरेका अभियानका सल्लाहकार दीपक समीपले साढे २ दसकदेखिको लगावको परिणाम अल्पज्ञानले मन छुने कविता संग्रह ल्याएको भन्दै प्रशंसा गरे ।

कवि अल्पज्ञानीले आमा बसुन्धरी तिवारीलाई आडैमा राखेर आफ्नो रचनात्मक यात्रा र कविता जन्माउँदाका प्रसव व्यथा सुनाए । बाँच्ने क्रममा सहर पसे पनि मनमा ग्रामीण परिवेशको झल्कोेले नछाडेका कारण त्यसै अनुसारका सिर्जना गरेको उनको भनाइ थियो । संरक्षण कविता आन्दोलन, संरक्षण कविता यात्रा, अक्षर यात्रा, समता काव्य सन्ध्यामा निरन्तरतको सहभागिता, अग्रजहरुको प्रेरणाका कारण आफूमा उत्साह थपिएको अल्पज्ञानीले सुनाए । पोखराको वेगनासमा जन्मेका उनी हाल काठमाडौं बस्छन् ।

पुछारसिटे अभियानका अभियन्ता सञ्जीव पौडेलले जीवन जिउनका लागि मानिस जहाँ पुगे पनि जन्मभूमि र माटोप्रतिको अगाध स्नेह नछुट्ने बताए । यसको उदाहरण अल्पज्ञानी नै रहेको उनको भनाइ थियो ।

पेज टर्नरले प्रकाशन गरेको कृतिको बजार मूल्य ३ सय ५० रुपैयाँ तोकिएको छ ।