पोखरा । लायन्स क्लब अफ इन्फरमेशन टेक्नोलोजीले जिल्ला प्रहरी कार्यालय कास्कीमा सिसिटीभी क्यामेरा मर्मत र नयाँ जडान गरेको छ ।
गत भदौ २४ गतेको जेनजीको आन्दोलनका क्रममा जिप्रका कास्कीमा आगलागीका कारण क्षती भएका सिसिटिभी लायन्स क्लबले मर्मत गरेको हो । हामी बनाउछौं हाम्रो देश भन्ने मुल नाराका साथ क्लबले शनिवार सिसिटीभी क्यामेरा मर्मत संगै नयाँ सिसिटीभी जडान गरेको लायन्स क्लब अफ इन्फर्मेशन टेक्नोलोजीका अध्यक्ष राबत गोम्जा तामाङले बताए ।
जिल्ला प्रहरी कार्यालय सबै नागरिकालाई सुरक्षा प्रदान गर्ने स्थान भएकाले प्रहरीको काम कारबाहीमा सहयोग पुगोस भन्ने उद्देश्य अनुरुप सहयोग गरिएको अध्यक्ष गोम्जा तामाङले सुनाए ।
उक्त कार्यालयमा १६ थान सिसिटीभी क्यामेरा जडान र मर्मत गरिएको सिसिटीभी जडान कार्यक्रमका संयोजक स्वयम्भु कुँवरले जानकारी दिए । जस मध्ये ९ वटा सिसिटीभी क्यामेरा नयाँ जडान गरिएको हो । उक्त क्यामेराहरुको मर्मत संभार समेत लायन्स क्लब अफ इन्फर्मेशन टेक्नोलोजीले नै गरिदिने र आगामी दिनमा पनि थप सहयोगलाई निरन्तरता दिने समेत कुँवरले बताए ।
यस अघि पार्दी माविमा समेत लायन्स क्लव अफ इन्फर्मेशन टेक्नोलोजीले सिसिटीभी क्यामेरा जडान गरेको थियो । यस्तै अगामी दिनमा अन्य संघसंस्थामा पनि सहयोग गर्दै जाने अध्यक्ष गोम्जाले बताए ।