कृष्ण न्यौपाने

तनहुँ भीमाद नगरपालिका ५ मा साढे ८४ लाखको लागतमा खानेपानी आयोजना निर्माण भएको छ । स्थानीयवासीलाई स्वच्छ खानेपानी पुर्‍याउने उद्देश्यका साथ विसं २०७४ मंसिर २९ गतेबाट निर्माण सुरु भएको आमडाँडा खानेपानी आयोजना ८४ लाख ४७ हजार २ सय ७१ रुपैयाँ लागतमा निर्माण भएको हो ।

पश्चिम नेपाल ग्रामीण खानेपानी तथा सरसफाइ परियोजना दोस्रो चरणको आर्थिक तथा प्राविधिक सहयोगमा खानेपानी आयोजना निर्माण गरिएको परियोजना सल्लाहकार वासुदेव पाण्डेले जानकारी दिए । खानेपानी आयोजनाका लागि नेपाल सरकारले ३० लाख २८ हजार २ सय ६२, फिनल्यान्ड सरकारले ३० लाख २८ हजार २ सय ६२ आर्थिक सहयोग गरेको छ । आयोजनाका लागि भीमाद नगरपालिकाले ८ लाख ४४ हजार ७ सय २७ र स्थानीय उपभोक्ताले ५ लाख ८३ हजार ४ सय ५३ लागत सहभागिता व्यहोरेका छन् भने ९ लाख ६२ हजार ५ सय ६७ बराबरको जनश्रमदान गरेका छन् ।

खानेपानी आयोजनाबाट ५९ घरधुरीका ३ सय ४३ उपभोक्ता लाभान्वित भएको आमडाँडा खानेपानी तथा सरसफाइ योजनाका अध्यक्ष विवेक रानाले बताए । ७ घर दलित र ५२ घर आदिवासी जनजातिको बसोबास रहेको यस ठाउँका १ सय ७० महिला र १ सय ७३ पुरुष आयोजनाबाट लाभान्वित भएका छन् । सोही वडाको भालुखोलाबाट पानी लिफ्ट मार्फत् ट्यांकीमा संकलन गरी उपभोक्ताको घर घरसम्म वितरण गरिएको रानाले जानकारी दिए । १ घर १ धारा अन्तर्गत सबै उपभोक्ताको घर घरमा धारा जडान गरिएको छ । खानेपानी योजना नहुँदा अस्थायी मूलबाट पानी ल्याउनुपर्ने बाध्यताले स्थानीय हैरान थिए । रानाले भने, ‘दैनिक २-३ घण्टा हिँडेर खानेपानीको जोहो गर्नुपर्ने बाध्यता थियो । अब भने उपभोक्तालाई सजिलो भएको छ ।’

खानेपानी योजना अन्तर्गत मूल इन्टेक १, सेमिमेन्टेसन ट्यांकी १, २ घनमिटरको रिजरभ्वायर १, १२ घनमिटरको रिजरभ्वायर १, ६ घनमिटरको ओभरहेड ट्यांकी १, २ घनमिटरको आरसिसी रिजरभ्वायर १, ९ घनमिटरको आरसिसी रिजरभ्वायर १ जडान गरिएको छ । खानेपानी योजनाको सोमबार उद्घाटन गर्दै भीमाद नगरपालिकाका प्रमुख मेखबहादुर थापाले सबै नगरवासीलाई स्वच्छ खानेपानी पुर्‍याउन नगरपालिका प्रतिबद्ध रहेको बताए ।