समाधान संवाददाता, दमौली

जिल्ला कारागार मनाङमा रहेका कैदीबन्दीलाई सीप प्रदान गर्ने उद्देश्यले हस्तकला तालिम सुरु भएको छ । घरेलु तथा साना उद्योग कार्यालय, चामे गाउँपालिका र कारागारको संयुक्त आयोजनामा सुरु तालिमको जिल्ला समन्वय समितिका प्रमुख यज्ञप्रसाद घलेले उद्घाटन गरेका छन् ।

घलले कारागारमा सजाय काट्ने समयको सदुपयोग गर्दै सीप सिकेर आत्मनिर्भर बन्न सहभागीलाई आग्रह गरे । कारागारमा सिकेको सीपले बाहिर निस्केपछि आयआर्जनको काममा सहयोग पुग्ने उनको भनाई थियो ।

प्रमुख जिल्ला अधिकारी रुद्रनाथ देवकोटाले फुर्सदको समयमा सीप सिक्दा आयआर्जनमा टेवा पुग्ने बताए । घरेलु कार्यालयका प्रमुख प्रदीप न्यौपानेले कारागार सजायको थलो मात्रै नभई सुधारको थलो पनि भएकोले यसखाले तालिमले कैदीबन्दीको आचरण सुधारमा सहयोग पुग्ने विश्वास व्यक्त गरे ।

४५ दिनसम्म चल्ने तालिममा बाँस तथा नियालो सम्बन्धि हस्तकलाको सीप प्रदान गरिनेछ । १५ जना सहभागी तालिममा बाँसबाट निर्माण हुने मुढा, ¥याक, सजावटका सामान र नियालोबाट निर्माण हुने कुर्सी, टेबल लगायतका सामान बनाउने सीप सिकाइने न्यौपानेले जानकारी दिए ।