सुरेशराज अधिकारी

फिर्के खोला पोखरेलीको महत्वपूर्ण प्राकृतिक सम्पत्ति हो । साझा सम्पदा पनि हो तर केही पोखरलीले नै व्यक्तिगत लाभका लागि अहिलेसम्म फिर्के दोहन गरिरहेका छन् । कोहीले घरको ढल तथा फोहोर फिर्केमै मिसाउँछन् त कसैले फिर्केमा नै घर बनाएका छन् ।

गत पुस २३ गते पोखरा महानगरले फिर्के खोलामा वडा सदस्य विष्णु परियारले नै बनाएको संरचना भत्कायो । धेरै सार्वजानिक र व्यक्तिगत संरचना अझै पनि फिर्के खोलाको मापदण्ड विपरीत छन् । फिर्केमाथि दोहन भने अझै रोकिएको छैन । बाग्लुङ बसपार्कभन्दा केही तल फिर्के पुल छ । उक्त पुलभन्दा २ सय मिटर तलदेखि फिर्केखोलाको मापदण्डभित्रका जग्गा व्यक्तिगत संरचना बनाउन प्रयोग भएको छ ।

• 

• 

• 

फिर्के छेउमा संरचना बनाइएको उक्त ठाउँमा खोलाको बीच भागमा नै तटबन्धन गरिएको छ । खोलालाई नै पश्चिमपट्टिबाट मोड्ने गरेर तटबन्ध गरिएको छ । केही भागमा रातो माटोले पुरिएको छ । जसबाट फिर्के अतिक्रमण प्रस्ट देखिन्छ । यस तटबन्धनले फिर्केलाई खुम्च्याउने गरी अतिक्रमण भएको नागरिक अगुवा रामबहादुर पौडेलले बताए ।

पोखरा महानगरपालिकाले फिर्के खोलाको किनारबाट १० मिटरभित्र कुनै पनि संरचना बनाउन नपाउने मापदण्ड बनाएको छ । तर ज्ञानबहादुर कोइरालाले फिर्केको बीचबाट तटबन्ध लगाई कोइरालाले जग्गा बढाउने काम गरेको पौडेलले दाबी गरे । कोइरालाले यसअघि पनि फिर्के अतिक्रमण गरी संरचना बनाएको स्थानीय बताउँछन् ।

पोखरा महानगरपालिका ५ का वडाध्यक्ष तथा महानगरका प्रवक्ता धनबहादुर नेपालीले पहिला पनि अतिक्रमण भएको बेलामा वडा कार्यालयले रोकेको बताए । अहिले पनि अतिक्रमण तीव्र भएको वडाध्यक्ष नेपालीको स्वीकारोक्ति छ । वडा कार्यालयले अतिक्रमण रोक्ने बताए ।

सार्वजनिक सम्पत्ति अतिक्रमण रोक्न राज्यको प्रयासले मात्र नहुने भएकाले जनताले पनि यसमा सहयोग गनुपर्ने नेपालीले बताए । पोखरा महानगरपालिका ५ का वडा सदस्य उज्ज्वल खत्रीले अतिक्रमण गरेकोे प्रत्यक्ष देखिएकाले फिर्के संरक्षणका लागि कानुन अनुसार अघि बढ्ने बताए ।

पोखरा महानगपालिकाले २०७४ साल चैतमा फिर्के खोलामा बनाइएको अवैध संरचनाको पहिचान गरेको थियो । मापदण्ड विपरीतका उक्त संरचना हटाइने भने पनि अहिलेसम्म हटाइएको छैन ।